លោកបណ្ឌិត ឈឹម ធឿន នាយកវិទ្យាស្ថានពហុបច្ចេកទេសភូមិភាគតេជោសែនបាត់ដំបង បានឱ្យដឹងថា កិច្ចសហការជាមួយក្រុមហ៊ុន សហគ្រាស និងវិស័យឯកជន បានផ្តល់ឱកាសដល់សិស្សនិស្សិតចុះកម្មសិក្សា និងហាត់ការនៅតាមកន្លែងការងារជាក់ស្តែង ដើម្បីពង្រឹងចំណេះដឹង និងជំនាញអនុវត្ត បន្ថែមលើការសិក្សាទ្រឹស្តីនៅក្នុងវិទ្យាស្ថាន។

លោកថ្លែងថា៖ «កិច្ចសហប្រតិបត្តិការជាមួយដៃគូទាំងក្នុងនិងក្រៅប្រទេស គឺជាកម្លាំងចលករសំខាន់ក្នុងការលើកកម្ពស់គុណភាពបណ្តុះបណ្តាល និងបង្កើតឱកាសកាន់តែទូលំទូលាយសម្រាប់សិស្សនិស្សិត ទាំងការចុះកម្មសិក្សា ហាត់ការ ការបន្តការសិក្សា និងការចូលទីផ្សារការងារ»។

ជាមួយគ្នានេះ លោកបណ្ឌិតបានបន្តថា សិស្សនិស្សិតក៏មានឱកាសចុះទស្សនកិច្ចសិក្សានៅតាមសហគ្រាស និងគ្រឹះស្ថានក្នុងវិស័យឯកជន ដើម្បីស្វែងយល់បន្ថែមអំពីបច្ចេកទេសទំនើប ដំណើរការផលិត និងបរិយាកាសការងារជាក់ស្តែង ដែលជាផ្នែកមួយជួយឱ្យពួកគេភ្ជាប់ចំណេះដឹងក្នុងថ្នាក់ទៅនឹងការអនុវត្តជាក់ស្តែង។

បន្ថែមពីនេះ វិទ្យាស្ថានបានសម្របសម្រួលឱកាសការងារជូនសិស្សនិស្សិតទាំងក្នុងខេត្ត ក្រៅខេត្ត និងឱកាសការងារស្របច្បាប់នៅក្រៅប្រទេស ព្រមទាំងទទួលបានការគាំទ្រផ្នែកសម្ភារៈ ឧបករណ៍ និងបរិក្ខារបណ្តុះបណ្តាលពីដៃគូសហការ។

ក្នុងចំណោមដៃគូសហការរបស់វិទ្យាស្ថាន ក៏មានដៃគូអភិវឌ្ឍន៍ជាតិ និងអន្តរជាតិ ដូចជា KOICA, JICA, GIZ និង Swisscontact ដែលបានចូលរួមគាំទ្រតាមរយៈគម្រោងអភិវឌ្ឍន៍ និងកិច្ចសហប្រតិបត្តិការផ្សេងៗ។

បើតាមលោកបណ្ឌិត ឈឹម ធឿន កិច្ចសហប្រតិបត្តិការទាំងនេះ មានគោលដៅរួមក្នុងការអភិវឌ្ឍធនធានមនុស្សប្រកបដោយជំនាញ និងគុណភាព ដោយធានាថា សិស្សនិស្សិតទទួលបានទាំងចំណេះដឹង ជំនាញបច្ចេកទេស បទពិសោធន៍ការងារ និងឱកាសការងារសមស្របនឹងជំនាញដែលបានសិក្សា៕