លោក សូរ ប៉ោត ជាស្ថាបត្យករ និងបុរាណវិទូបានឱ្យដឹងថា ផ្អែកលើផែនទីហានិភ័យ ខ្លោងទ្វារខាងជើងមានកម្រិតហានិភ័យខ្ពស់ និងត្រូវធ្វើការជួសជុលបន្ទាន់ ដើម្បីទប់ស្កាត់ និងបញ្ចៀសការរលុះធ្លាក់នៃប្រាង្គ។

ក្នុងនោះ ក្រុមការងារផ្តោតសំខាន់ទៅលើការជួសជុលគ្រឹះ និងជញ្ជាំងថ្មបាយក្រៀម ដែលព័ទ្ធជុំវិញជារចនាសម្ពន្ធសម្រាប់ទ្រទ្រង់ដល់តួប៉មឥដ្ឋផ្នែកខាងលើ ដោយធ្វើការសម្អាតយកកំណកដីចេញពីតាមចន្លោះថ្នេរថ្ម និងកន្លែងប្រេះ រួចបិតបាយអឡើងវិញ ដើម្បីធានាមិនឱ្យទឹកជ្រាបចូល។

ដោយឡែកសម្រាប់ទីតាំងណាដែលថ្មនៅមានគុណភាពល្អ យើងរក្សាទុកដដែល លើកលែងតែថ្មអស់គុណភាព និងពុកផុយ ដែលត្រូវជំនួសដោយថ្មថ្មី ប៉ុន្តែត្រូវរក្សាទម្រង់ដើមទៅតាមបច្ចេកទេស។

គម្រោងនេះបានចាប់ផ្តើមពីចុងឆ្នាំ២០២៥ ហើយគ្រោងនឹងបញ្ចប់ក្នុងខែមេសា ឆ្នាំ២០២៦ខាងមុខ។ មកដល់ពេលនេះ ដំណើរការជួសជុលសម្រេចលទ្ធផលបានប្រមាណជាង៥០ភាគរយហើយ។

សូមជម្រាបជូនថា ប្រាសាទមេបុណ្យខាងកើត ជាប្រាសាទភ្នំមួយ ស្ថិតនៅចំកណ្តាលបារាយណ៍យសោធរតដាក (បារាយណ៍ខាងកើត)។ ប្រាសាទនេះ មានអាយុកាលចាស់ជាងប្រាសាទប្រែរូប កសាងឡើងក្នុងរជ្ជកាល ព្រះបាទរាជេន្រ្ទវម៌្មទី២ នាសតវត្សទី១០ ដើម្បីឧទ្ទិសថ្វាយបុព្វការីជន៕