លោក ស្រ៊ុន ស្រ៊ន អភិបាលរងខេត្តកំពង់ស្ពឺ នភថ្ងៃទី១៥ ខែតុលា ឆ្នាំ២០២៥ បានឱ្យដឹងថា បច្ចុប្បន្នខេត្តកំពង់ស្ពឺមានរោងចក្រ សហគ្រាសសរុបប្រមាណ១៤៥៨រោងចក្រ សហគ្រាស និងមានកម្មករ កម្មការិនីកំពុងបម្រើការប្រមាណជិត៣០ម៉ឺននាក់ ហើយចំនួននេះនឹងមានការកើនឡើងបន្ថែមទៀត ខណៈរោងចក្រ សហគ្រាសមួយចំនួនបាននិងកំពុងសាងសង់និងខ្លះទៀតសាងសង់រួចត្រៀមបើកដំណើរការ។ ដោយមានកំណើននិងស្របពេលដែលខេត្តមួយនេះនៅពុំទាន់មានរោងចក្រចម្រោះទឹកកង្វក់ចេញពីរោងចក្រ សហគ្រាសនៅឡើយ ក្រុមហ៊ុនមួយរបស់ចិនបានសម្រេចបោះទុនវិនិយោគរាប់លានដុល្លាលើការសាងសង់រោងចក្រចម្រោះទឹកកង្វក់មួយស្ថិតក្នុងភូមិបាក់ធ្មេញ ឃុំរលាំងចក ស្រុកសំរោងទង ខេត្តកំពង់ស្ពឺ ដើម្បីចម្រោះទឹកកខ្វក់ចេញពីរោងចក្រ សហគ្រាសទាំងអស់ក្នុងខេត្តលើផ្ទៃដីប្រមាណជិត៣០ហិកតា ហើយនៅថ្ងៃនេះអាជ្ញាធរខេត្តបានដឹកនាំមន្ទីរជំនាញពាក់ពន្ធ័ចុះពិនិត្យនិងស្រង់ទិន្នន័យនៃផលប៉ះពាល់ប្រជាពលរដ្ឋអាស្រ័យផលជាក់ស្តែងក្នុងផ្ទៃអាងដែលត្រូវអនុវត្តគម្រោងនេះ។
លោក ស្រ៊ុន ស្រ៊ន បានបញ្ជាក់ថា រាល់ទឹកកខ្វក់ទាំងអស់ដែលចេញពីរោងចក្រ សហគ្រាសនឹងត្រូវប្រមូលយកទៅចម្រោះយ៉ាងស្អាត រួចទើបបង្ហូរចេញទៅកាន់ទីវាល។ អីចឹង យើងអាចប្រើប្រាស់ទឹកនេះបាន យកទៅស្រោចដំណាំដូច្នេះវាអត់បង្កផលប៉ះពាល់ដល់សុខភាពដំណាំឡើយ។លោកថារោងចក្រ សហគ្រាស មានអាងស្ដុកទឹកកខ្វក់រៀងខ្លួន ប៉ុន្តែវាមិនដូចអ្វីដែលមានរោងចក្រសម្រាប់ចម្រោះទឹកកខ្វក់នោះទេ ពីព្រោះអាងស្ដុកទឹកកខ្វក់នៅតាមរោងចក្រ សហគ្រាស វាគ្រាន់តែជាអាងមួយដើម្បីទប់ស្កាត់កាកសំណល់កខ្វក់ប៉ុណ្ណោះ ហើយបើថ្ងៃណាមួយមានភ្លៀងច្រើនបង្កឱ្យទៅជាទឹកជំនន់ នោះទឹកក្នុងអាងដែលស្តុកនោះ វានឹងអាចហៀរចេញទៅក្រៅ បង្កឱ្យមានប៉ះពាល់ដល់បរិស្ថានរស់នៅរបស់ប្រជាពលរដ្ឋ និងសត្វក្នុងទឹក។
ទន្ទឹមនោះ លោក ស្រ៊ុន ស្រ៊ន អំពាវនាវដល់ប្រជាពលរដ្ឋដែលបាននិងកំពុងអាស្រ័យផលក្នុងផ្ទៃអាងនេះកុំបង្កការរំខានដល់ដំណើរការវាស់វែងរបស់ក្រុមការងារជំនាញ ហើយប្រសិនការវាស់វែងនេះមានការពាក់ព័ន្ធទៅនិងដីអាស្រ័យ សូមបងប្អូនប្រជាពលរដ្ឋនាំគ្នាមកដាក់ពាក្យតវ៉ាជាមួយក្រុមការងារដែលស្ថិតនៅទីតាំងនោះឬមករដ្ឋបាលខេត្តដោយភ្ជាប់មកជាមួយនូវឯកសារពាក់ព័ន្ធដើម្បីឱ្យអាជ្ញាធរដោះស្រាយសំណងឬភាពត្រឹមត្រូវជូនបងប្អូនប្រជាពលរដ្ឋយើងគ្រប់គ្នា៕