សម្ដេចមហាបវរធិបតីបានប្រកាសថា រោងចក្រសហគ្រាសនៅកម្ពុជា បានកើនឡើងដល់ជាង៤៥០០០រោងចក្រសហគ្រាស និងមានបងប្អូនកម្មករនិយោជិតបម្រើការងារជាង១លាន៦សែននាក់ ដែលក្នុងមួយឆ្នាំៗ អាចរកថវិកាបានជាង៥ពាន់លានដុល្លារអាមេរិក។ ទន្ទឹមនឹងនេះ សម្ដេចមហាបវរធិបតីបានបញ្ជាក់ថា រោងចក្រសហគ្រាសនៅកម្ពុជាបច្ចុប្បន្នបានកើនដល់ជាង៤ម៉ឺនរោងចក្រ សហគ្រាស ដោយមានកម្មករធ្វើការនៅតាមរោងចក្រ សហគ្រាសទាំងនោះមានជិត២លាននាក់ និងទទួលបានប្រាក់ឈ្នួលជាង៥ពាន់លានដុល្លារក្នុងមួយឆ្នាំ។ ជាពិសេស បងប្អូនកម្មករ និយោជិតនៅក្នុងតំបន់ សេដ្ឋកិច្ចពិសេសនៅខេត្តព្រះសីហនុឡើងដល់ជាង៣ម៉ឺននាក់នោះមិន នោះមែនជាតួលេខលើក្រដាសទេ គឺជាតួលេខពិតប្រាកដ។ 

សម្ដេចមហាបវរធិបតីក៏បានបង្ហាញនូវមោទនភាព ដោយមើលឃើញពីកំណើនការងារពលរដ្ឋនៅខេត្តព្រះសីហនុ មានការកើនឡើងកាន់តែច្រើនផងដែរ។ 

ក្នុងឱកាសនោះ សម្ដេចមហាបវរធិបតី បានជំរុញឱ្យលោកហេង សួរ រដ្ឋមន្រ្ដីក្រសួងកាងារ និងបណ្តុះបណ្តាលវិជ្ជាជីវៈ ត្រូវខិតខំបង្កើតការងារ និងផ្ដល់អត្ថប្រយោជន៍ជូនបងប្អូនកម្មករនិយោជិតបន្ថែមទៀត គឺដើម្បីជួយបងប្អូនកម្មករនិយោជិតរបស់យើងមានជីវៈភាពកាន់តែល្អប្រសើរ។ 

ជាមួយគ្នានេះ លោក ហេង សួរ បានឱ្យដឹងថា គិតពីដំណាច់ឆ្នាំ២០២៤ ដល់ត្រឹមខែមេសា ឆ្នាំ២០២៥ នេះ សហគ្រាស គ្រឹះស្ថាន បានកើនពីចំនួន ៤៤ ៧៩៨ ដល់ចំនួន ៤៥ ៣៨៦សហគ្រាស ហើយកម្មករនិយោជិតបានកើន ពីប្រមាណ ១,៨២លាននាក់ ដល់ប្រមាណ១,៨៧លាននាក់ ដែលអាចផ្តល់ប្រាក់ឈ្នួលជូនបងប្អូន កម្មករនិយោជិតមធ្យមសរុបប្រចាំឆ្នាំប្រមាណ ៦ពាន់លានដុល្លារអាម៉េរិក។ 

ក្នុងនោះ គ្រាន់តែវិស័យកាត់ដេរមានសហគ្រាស គ្រឹះស្ថានសរុបចំនួន ១ ៦៥៧សហគ្រាស មានកម្មករនិយោជិតប្រមាណ ៩៧ម៉ឺននាក់ ទទួលបានប្រាក់ឈ្នួលមធ្យមសរុបប្រចាំឆ្នាំប្រមាណ ៣,១ពាន់លាន ដុល្លារអាមេរិក៕