ថ្លែងនៅក្នុងឱកាសអញ្ជើញជាអធិបតីបិទសន្និបាតបូកសរុបលទ្ធផលការងារ របស់ក្រសួងមុខងារធារណៈ នាព្រឹកថ្ងៃទី២០ ខែមីនា ឆ្នាំ២០២៥នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានណែនាំឱ្យលោក ឃួង ស្រេង រដ្ឋបាលរាធានីភ្នំពេញ ត្រូវត្រៀមរៀបចំរថយន្ត ក្រុងសម្រាប់ដឹកបងប្អូនប្រជាពលរដ្ឋ ឬកម្មករនិយោជិតទៅកាន់ស្រុកកំណើតជួបជុំក្រុមគ្រួសារ ដូចជាបណ្ដាឆ្នាំមុនៗ ខណៈដែលក្នុងឱកាសបុណ្យចូលឆ្នាំថ្មីប្រពៃណីខ្មែរកាន់តែខិតជិតមកដល់ហើយ ។

សម្ដេចធិបតីបានបញ្ជាក់ថា ការរៀបចំរថយន្ត ក្រុងសម្រាប់ដឹកបងប្អូនប្រជាពលរដ្ឋទៅកាន់ស្រុកកំណើតក្នុងឱកាសបុណ្យចូលឆ្នាំនេះ គឺបងប្អូនប្រជាពលរដ្ឋចំនេញថវិកាច្រើន និងសន្សំលុយ ដើម្បីអាចយកទៅធ្វើបុណ្យតាមលទ្ធភាពផងដែរ បើទោះបីតិចក្ដីច្រើនក្ដី តែរាជរដ្ឋាភិបាលខិតខំជួយសម្រួលបន្ថែម។

សូមបញ្ជាក់ថា ក្នុងពិធីបុណ្យជាតិធំៗម្ដងៗ គឺរាជរដ្ឋាភិបាលតែងតែធ្វើការរៀបចំរថយន្តក្រុងសាធារណៈ ជូនដល់បងប្អូនប្រជាពលរដ្ឋទៅស្រុកកំណើត ដោយឥតគិតថ្លៃ ព្រមជាមួយផ្ដល់ទឹកសុទ្ធផងដែរ ៕