អ្នកអង្គម្ចាស់បណ្ឌិត ស៊ីសុវត្ថិ រិទ្ធីរ៉ាវង្ស នាយកវិទ្យាស្ថានពហុបច្ចេកទេសខេត្តកោះកុង បានឱ្យដឹងថា ក្នុងរយៈពេល៣ឆ្នាំកន្លងមក វិទ្យាស្ថានបានខិតខំពង្រីកការបណ្តុះបណ្តាលបច្ចេកទេស និងវិជ្ជាជីវៈឱ្យទៅដល់សហគមន៍ ដើម្បីបង្កើនឱកាសទទួលបានជំនាញសម្រាប់ប្រជាពលរដ្ឋ និងយុវជននៅមូលដ្ឋាន។

​អ្នកអង្គម្ចាស់​មានព្រះបន្ទូលថា៖«យើងបានដាក់គ្រូបច្ចេកទេស ទាំងគ្រូក្របខណ្ឌ និងគ្រូកិច្ចសន្យា ទៅបណ្តុះបណ្តាលនៅតាមសហគមន៍ដែលនៅជិតសិស្ស ដើម្បីឱ្យការរៀនជំនាញកាន់តែងាយស្រួល និងឆ្លើយតបទៅនឹងតម្រូវការរបស់ប្រជាពលរដ្ឋនៅមូលដ្ឋាន»។ អ្នកអង្គម្ចាស់បណ្ឌិត បានបញ្ជាក់ថា តាមរយៈការខិតខំប្រឹងប្រែងនេះ ក្នុងរយៈពេល៣ឆ្នាំចុងក្រោយ វិទ្យាស្ថានពហុបច្ចេកទេសខេត្តកោះកុង បានបណ្តុះបណ្តាលសិស្ស និងសិក្ខាកាមសរុបចំនួន ៤,៩៦៩នាក់ ក្នុងនោះស្ត្រី ២,០៣៦នាក់។

បើតាមអ្នកអង្គម្ចាស់ ក្រៅពីការពង្រីកការបណ្តុះបណ្តាលតាមសហគមន៍ វិទ្យាស្ថានក៏បានយកចិត្តទុកដាក់លើគុណភាព នៃការបណ្តុះបណ្តាល ដោយផ្តោតលើការផ្តល់ជំនាញដែលអាចប្រើប្រាស់បានជាក់ស្តែង និងជួយឱ្យសិស្សមានលទ្ធភាពស្វែងរកការងារធ្វើនៅតាមសហគ្រាស រោងចក្រ ឬអាចយកជំនាញដែលទទួលបានទៅប្រកបមុខរបរដោយខ្លួនឯងក្រោយបញ្ចប់ការសិក្សា។

អ្នកអង្គម្ចាស់បណ្ឌិត ស៊ីសុវត្ថិ រិទ្ធីរ៉ាវង្ស មានព្រះបន្ទូលបញ្ជាក់៖ «គោលដៅសំខាន់របស់យើង គឺមិនត្រឹមតែបណ្តុះបណ្តាលឱ្យសិស្សចេះជំនាញប៉ុណ្ណោះទេ ប៉ុន្តែត្រូវឱ្យពួកគេអាចយកជំនាញដែលរៀនបានទៅប្រើប្រាស់ ដើម្បីរកការងារធ្វើ ឬបង្កើតមុខរបរផ្ទាល់ខ្លួន និងមានប្រាក់ចំណូលសម្រាប់ជីវភាពគ្រួសារ»៕