លោក ហម អរុណ អនុប្រធានមន្ទីរទេសរណ៍ខេត្តបាត់ដំបងបានឱ្យដឹងថានៅគោលដៅទេសចរណ៍នានា ដូចជា តាមរីសត សណ្ឋាគារ មួយចំនួនធំ និងនៅតំបន់ស្រុកសំឡូតជាដើម មានភ្ញៀវទេសចរជាតិ អន្តរជាតិបានកក់ ស្ទើរពេញអស់ទៅហើយ សម្រាប់ថ្ងៃបុណ្យអុំទូកឆ្នាំនេះ ។ លោកបន្ថែមថា ក្នុងអំឡុងពេលផុតរដូវភ្លៀង ចូលដល់រដូវត្រជាក់នេះ តាមរមនីយដ្ឋានធម្មជាតិនានា មានសម្រស់ ធម្មជាតិស្រស់បំព្រង គួរជាទីគយគន់ និងទាក់ទាញ ភ្ញៀវអាចស្នាក់នៅ ដកស្រង់បទពិសោធន៍ សម្រាប់ដំណើរកំសាន្ត របស់ពួកគេ ក្នុងរដូវនេះ ។

លោកបញ្ជាក់ថា ក្នុងឱកាសព្រះរាជ ពិធីបុណ្យអុំទូក បណ្តែតប្រទីប និងសំពះព្រះខែ អកអំបុក នេះ ថ្វីត្បិត ខេត្តបាត់ដំបងមិនមានរៀបចំព្រឹត្តិការផ្លូវការ ក៏ពិតមែនតែនៅតាមទីប្រជុំជន មានរៀបចំភ្លើងបំភ្លឺ និងតាមទីវត្ត អារាមនានា ដូចជាវត្តឯកភ្នំមានការរៀបចំពិធីដាល់អំបុកជាដើម ។

ចំណែកនៅតាមផ្លូវលេខពីរក្រុងបាត់ដំបងអង្គការហ្វាពន្លឺសិល្បៈបានរៀបចំកម្មវិធីសិល្បៈរយៈពេល៥យប់ ចាប់ពីយប់ ថ្ងៃទី០៣ដល់យប់ថ្ងៃទី៧ខែវិច្ឆិកា មានកម្មវិធី ដូចជាការប្រគុំតន្រ្តី ការរាំកំសាន្តជាមួយ DJ ការសម្តែងសៀក ការប្រឡងចំរៀង ការគូរគំនូរ និងដង្ហែក្បួនជាដើម ដើម្បីទាក់ទាញភ្ញៀវទេសចរជាតិ អន្តរជាតិមកលេងកំសាន្ត។

មន្រ្តីមន្ទីរទេសចរណ៍ខាងលើបានកត់សំគាល់ថា ក្នុងអំឡុងពេលនេះនៅក្រុងបាត់ដំបង មានកំណើនភ្ញៀវអ៊ឺរ៉ុបមកច្រើន ដោយពួកគាត់ មកទស្សនា សិល្បៈអង្គការហ្វារផង និងដើរលេងកំសាន្តផង ក្នុងឱកាសព្រះរាជពិធីបុណ្យអុំទូកឆ្នាំនេះ ពិសេសអំឡុង ពេលផុតរដូវភ្លៀង ចូលរដូវរំហើយនេះ ៕