លោករដ្ឋមន្រ្ដីមានប្រសាសន៍ថា អង្គសិក្ខាសាលារយៈពេល ២ថ្ងៃនេះបាន ចែករំលែកបទពិសោធ និងចំណេះដឹងអំពីដល់សិក្ខាកាមដែលជាអ្នកសារព័ត៌មាន បានយល់ដឹងបន្ថែមទៀតពីការកែសម្រួលព័ត៌មានប្រកបដោយគុណភាព ការវិភាគវីដេអូ និងការកំណត់ទីតាំងភូមិសាស្ត្រ ការផ្ទៀងផ្ទាត់ ព័ត៌មានជាមួយនឹងបច្ចេកវិទ្យាបញ្ញាសប្បនិម្មិត (AI) ការត្រួតពិនិត្យទិន្នន័យ Metadata និងពាក្យគន្លឹះ ព្រមទាំងការស្វែងរកព័ត៌មានតាមបណ្តាទំនាក់ទំនងសង្គម និងការប្រើប្រាស់ AI language models ប្រកបដោយប្រសិទ្ធភាព។

ទន្ទឹមនឹងនេះ លោករំពឹងថា ក្រោយពីអ្នកសារព័ត៌មានទទួលបានបទពិសោធ និងចំណេះដឹងនាពេលនេះរួចហើយ ដើម្បីយកចំណេះដឹងទាំងអស់នេះជួយចែករំលែកដល់អ្នកសារព័ត៌មានផ្សេងៗឱ្យបានទូលំទូលាយក្នុងការរួមគ្នាប្រយុទ្ធប្រឆាំងព័ត៌មានក្លែងក្លាយនៅក្នុងប្រទេសកម្ពុជាឱ្យកាន់តែមានប្រសិទ្ធភាព។

លោកបញ្ជាក់ថា អ្នកសារព័ត៌មាននាពេលបច្ចុប្បន្ន និងនាពេលអនាគត គឺត្រូវតែពង្រឹងសមត្ថភាពឱ្យបានខ្លាំងក្លា ដើម្បីឆ្លើយតបភាពនៃបច្ចេកវិទ្យាទំនើបឥតឈប់ឈរ ពីព្រោះកិច្ចការប្រយុទ្ធប្រឆាំងព័ត៌មានក្លែងនេះ មិនមែនធ្វើតែរាជរដ្ឋាភិបាល និងក្រសួងព័ត៌មាននោះទេ គឺរួមគ្នាធ្វើទាំងអស់គ្នាផងដែរ។

លោក ស្រេង ដារ៉ា នាយកសារព័ត៌មាន Cam Post បានប្ដេជ្ញាចិត្ដនឹងយកបទពិសោធន៍ និងចំណេះដឹងដែលទទួលបានរយៈពេល២ថ្ងៃនេះ ដើម្បីយកទៅអនុវត្ដ និងចែករំលែកដល់អ្នកសារព័ត៌មានក្នុងអាជីពផងដែរ។

លោកបានបញ្ជាក់ថា ព័ត៌មានក្លែងក្លាជាសត្រូវធំបំផុត មិនថាអ្នកសារព័ត៌មានអាជីព និងពលរដ្ឋនោះទេ ដែលធ្វើឱ្យមានការភ័ណ្ឌច្រឡំ ខូចសណ្ដាប់ធ្នាប់ និងបង្ករសន្ដិសុខនៅក្នុងសង្គមជាតិ៕