ការអះអាងរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ធ្វើឡើងក្នុងឱកាសអញ្ជើញជាអធិបតីភាពដ៏ខ្ពង់ខ្ពស់ក្នុងពិធីបើកសន្និសីទអន្តរជាតិ ស្តីពីការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា នៅព្រឹកថ្ងៃ ២៣ ខែកញ្ញា ឆ្នាំ២០២៦នេះ ។

សម្ដេចធិបតីបានគូសបញ្ជាក់ជាថ្មីថា ឧស្សាហកម្មឆបោកតាមប្រព័ន្ធបច្ចេកវិទ្យាមិនបានចាប់ផ្ដើមនៅក្នុងប្រទេសកម្ពុជានោះទេ ហើយក៏មិនបានកើតឡើងតែនៅក្នុងប្រទេសកម្ពុជានោះដែរ។ ការពាក់ព័ន្ធដំបូងលើបញ្ហានេះរបស់ប្រទេសកម្ពុជា ត្រូវបានផ្សាភ្ជាប់ទៅនឹងកំណើននៃល្បែងតាមប្រព័ន្ធបច្ចេកវិទ្យា និងធុរកិច្ចនានាពាក់ព័ន្ធនឹងកាស៊ីណូ។

សម្ដេចធិបតីបញ្ជាក់ថា នៅពេលនេះ បណ្ដាញឧក្រិដ្ឋកម្មឆបោកតាមប្រព័ន្ធបច្ចេកវិទ្យាបានវិវត្ត និងសម្របខ្លួនឆ្លងកាត់តាមរយៈព្រំដែនយ៉ាងឆាប់រហ័ស ដោយបណ្ដាញឧក្រិដ្ឋកម្មទាំងនេះ បានឆ្លៀតឱកាសពីអចលទ្រព្យ ពាណិជ្ជកម្ម ចន្លោះប្រហោងនៃបទប្បញ្ញត្តិ និងបណ្ដាញទូរគមនាគមន៍ឆ្លងដែនដ៏ស្មុគ ដើម្បីបង្កើតជាប្រព័ន្ធអេកូឡូស៊ីនៃការឆបោកឆ្លងដែន។

ជាមួយគ្នានេះ សម្ដេចធិបតីបន្ថែមថា រាជរដ្ឋាភិបាលកម្ពុជាបានប្ដេជ្ញាចិត្តយ៉ាងមុតមាំក្នុងការលុបបំបាត់បទល្មើសស្កេមអនឡាញ ក្នុងយកសម័យឌីជីថលនេះ ។

ទន្ទឹមនឹងនេះ សម្ដេចធិបតីជំរុញឱ្យប្រទេសនីមួយៗ ត្រូវដាក់វិធានការឱ្យតឹងរឹង និងអប់រំដល់ប្រជាពលរដ្ឋអំពីការឆបោកតាមប្រព័ន្ធបច្ចេកវិទ្យាឱ្យមានប្រសិទ្ធភាព ខណៈបញ្ហានេះ គឺជា ឧក្រិដ្ឋកម្មឆ្លងដែន និងជាបញ្ហាសកល ដែលគ្មានប្រទេសណាមួយអាចដោះស្រាយដោយឯកឯងបានឡើយ៕