|
សម្តេចធិបតី ៖ ក្មេងទំនើបទៅបម្រើការងារសមរភូមិមុខ គឺគ្មានសិទ្ធធ្វើជាកងទ័ព និងកាន់កាំភ្លើងបាញ់នោះឡើយ
ថ្ងៃទី ៖ 01-05-2026, ដោយ Dara007 , 10 Views
ព្រះសីហនុៈ សម្តេចធិបតី អះអាងថា គ្មានករណីបង្កើតច្បាប់ថ្មី ដាក់ក្មេងទំនើបទៅបម្រើការងារសមរភូមិមុខនោះទេ ហើយការបញ្ជូនក្មេងទំនើបទៅសមរភូមិមុខ គឺដើម្បីជួយការងារ ចាក់លេណដ្ឋាន ឬការងារសំណង់ផ្សេងៗ ។ការអះអាងរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងឱកាសអញ្ជើញជាអធិបតីភាពដ៏ខ្ពង់ខ្ពស់ក្នុងពិធីសំណេះសំណាលជាមួយ មន្ត្រីរាជការ បុគ្គលិក កម្មករ និយោជិត កំពង់ផែស្វយ័តក្រុងព្រះសីហនុ នាឱកាសអបអរសាទរខួប អនុស្សាវរីយ៍ លើកទី១៤០ នៃទិវាពលកម្មអន្តរជាតិ ១ ឧសភា ឆ្នាំ២០២៦ និងខួបអនុស្សាវរីយ៍ លើកទី៣០ នៃជំនួយ អភិវឌ្ឍន៍ផ្លូវការរបស់ជប៉ុនសម្រាប់កំពង់ផែស្វយ័តក្រុងព្រះសីហនុ (១៩៩៦-២០២៦)នៅព្រឹកថ្ងៃទី ១ ខែឧសភា ឆ្នាំ២០២៦នេះ ក្រោយមានក្រុមវិភាគមួយចំនួនបានរិះគន់ និងមិនយល់ ហើយបែរជាបកស្រាយធ្វើឱ្យមានការភ័ណ្ឌច្រឡំនៅក្នុងសង្គម។
សម្ដេចធិបតី បានគូសឡើងវិញបន្ទាប់ពីបានណែនាំដល់ក្រសួងយុត្តិធម៌ អគ្គស្នងការនគរបាលជាតិ និងអគ្គមេបញ្ជាការកងយោធពលខេមរភូមិន្ទឱ្យសិក្សាផ្លូវច្បាប់ មិនមែនបង្កើតច្បាប់ថ្មីទេ ដើម្បីបញ្ជូនឬយកក្រុមក្មេងទំនើងដែលឃាត់ខ្លួនបានទៅបម្រើការងារនៅតាមសមរភូមិមុខ ដើម្បីជួយការងារនៅតំបន់ព្រំដែន ដូចជាការចាក់លេណដ្ឋាន ឬការងារសំណង់ផ្សេងៗ ។ សម្តេចធិបតី អះអាងថា គ្មានករណីបង្កើតច្បាប់ថ្មីដាក់ក្មេងទំនើបទៅបម្រើការងារសមរភូមិមុខនោះទេ ហើយក្មេងទំនើបទៅបម្រើការងារសមរភូមិមុខនេះ គឺគ្មានសិទ្ធធ្វើជាកងទ័ព និងកាន់កាំភ្លើងបាញ់នោះទេ។សម្តេចធិបតី គូសបញ្ជាក់ថា ការយកក្រុមក្មេងទំនើងដែលបង្កផលប៉ៈពាល់ដល់សង្គមទៅបម្រើការងារជូនប្រទេសជាតិ នូវសមរភូមិ គឺជាការអប់រំ ហើយការអប់រំនេះទៀតសោត ជាជាងការដាក់ក្នុងពន្ធធនាគារ ដែលមិនធ្វើអ្វីបម្រើប្រយោជន៍ដល់សង្គមជាតិនោះឡើយ ៕
|