លោក ជា ធីរិទ្ធ អ្នកនាំពាក្យព្រឹទ្ធសភាបានថ្លែងឱ្យដឹងថា ក្រោយជំនួបរវាងសម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទីនៃព្រះរាជាណាចក្រកម្ពុជា និងលោកស្រី  វ្លាដាំងកា អាន់ឌ្រេវ៉ា (Vladanka Andreeva) អ្នកសម្របសម្រួលអង្គការសហប្រជាជាតិ តែងតាំងថ្មីប្រចាំនៅកម្ពុជាថា លោកស្រីលើកឡើងថា អង្គការសហប្រជាជាតិនិងកម្ពុជាពិតជាមានទំនាក់ទំនងជាមួយគ្នាដ៏យូរអង្វែង និងរឹងមាំទាំងនាពេលកន្លងមក និងបច្ចុប្បន្ន ។

លោកស្រីបានបញ្ជាក់នៅចំពោះមុខសម្តេចតេជោថា អង្គការសហប្រជាជាតិ នឹងរង់ចាំជួយដល់ប្រទេសកម្ពុជាជានិច្ច ជាពិសេសការជួយជ្រោមជ្រែងដល់ប្រទេសកម្ពុជា ឱ្យក្លាយទៅជាប្រទេសដែលមានចំណូលមធ្យមកម្រិតខ្ពស់នៅក្នុងឆ្នាំ២០៣០” ។ សម្តេចតេជោបានបង្ហាញនូវការពេញចិត្តជាខ្លាំង ។

ជាមួយគ្នានេះ សម្តេចតេជោ និងលោកស្រី វ្លាដាំងកា អាន់ឌ្រេវ៉ា ក៏បានពិភាក្សាអំពីគោលដៅទៅពេលខាងមុខអំពីកម្ពុជាឱ្យក្លាយជាប្រទេសមានប្រាក់ចំណូលកម្រិតមធ្យមនៅឆ្នាំ២០៣០ដែលដាក់ចេញដោយអង្គការសហប្រជាជាតិ ។ សូមបញ្ជាក់ថា រាជរដ្ឋាភិបាលកម្ពុជា ក្រោមការដឹកនាំរបស់សម្តេចធិបតី ហ៊ុន ម៉ាណែត នាយរដ្ឋមន្រ្តីបានប្តេជ្ញាមិនបោះបង់ ឬផ្លាស់ប្ដូរនូវទិសដៅអនុវត្តរយៈពេលវែងនោះទេ ដោយរាជរដ្ឋាភិបាលកម្ពុជា នៅតែរក្សាគោលដៅសម្រេចមហិច្ឆតារបស់ខ្លួនដដែល គឺកម្ពុជាក្លាយជាប្រទេសចំណូលមធ្យមកម្រិតខ្ពស់នៅឆ្នាំ២០៣០ និងចំណូលខ្ពស់នៅឆ្នាំ២០៥០៕