ថ្លែងក្នុងសន្នីសីទសារព័ត៌មាន នាល្ងាចថ្ងៃទី១២ ខែធ្នូ ឆ្នាំ២០២៥ នៅសណ្ឋាគារសូហ្វីតែល ខេត្តសៀមរាប បន្ទាប់ពីបញ្ចប់កិច្ចប្រជុំពេញអង្គលើកទី៣២ របស់គណៈកម្មាធិការអន្តរជាតិ សម្របសម្រួលកិច្ចគាំពារ និងអភិវឌ្ឍន៍តំបន់រមណីយដ្ឋានប្រវត្តិសាស្រ្តអង្គរ និងសំបូរព្រៃគុក ដែលហៅកាត់ថា អាយស៊ីស៊ី-អង្គរ/សំបូរព្រៃគុក (ICC-Angkor/Sambor Prei Kuk) ដែលក្នុងឱកាសនោះ លោកស្រីបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ មានប្រសាសន៍ថា ចាប់តាំងពីមានការផ្ទុះអាវុធរវាងកម្ពុជា-ថៃ តាំងពីខែកក្កដា មក ទាហានថៃ បានប្រើប្រាស់ អាវុធធុនធ្ងន់ មកលើប្រាសាទខ្មែរចំនួនពីរទីតាំង គឺប្រាសាទព្រះវិហារ និងប្រាសាទតាក្របី ដែលរងការខូចខាតធ្ងន់ធ្ងរ។ មហាជនបានចោទជាសំណួរជាច្រើន ជុំវិញការស្ងៀមស្ងាត់របស់ អង្គការយូណេស្កូ ដែលគាំពារកិច្ចការវប្បធម៌ និងបេតិកភណ្ឌ ដែលមិនមានការថ្កោលទោសចំៗទៅភាគីថៃ ដែលបាននិងកំពុងបំផ្លិចបំផ្លាញសម្បត្តិបេតិកភណ្ឌជាតិ និងពិភពលោកយ៉ាងដូច្នេះ។

លោកស្រីបានពន្យល់ថា ជាអង្គការឯករាជ្យដែលធ្វើការលើផ្នែកបេតិកភណ្ឌ និងមានសមាជិក ច្រើនប្រទេស យូណេស្កូមាននីតិវិធីច្បាស់លាស់សម្រាប់ធ្វើកិច្ចការងារនានា រួមទាំងការបំផ្លាញបេតិកភណ្ឌ របស់ទាហានថៃមកលើប្រាសាទបុរាណខ្មែរផងដែរ។ លោកស្រីបានបញ្ជាក់ថា ពេលមាន ហេតុការណ៍ភ្លាមៗ កម្ពុជាបានដាក់លិខិតទៅកាន់យូណេស្កូ បន្ទាប់មកស្ថាប័ននេះ ចេញលិខិតអំពាវនាវ ឱ្យបញ្ឈប់សកម្មភាពជាបន្ទាន់។

ជំហានបន្ទាប់ អង្គការដែលមានស្នាក់ការធំនៅប្រទេសបារាំងមួយនេះ ត្រូវបញ្ជូនអ្នកជំនាញការដើម្បីចុះពិនិត្យស្ថានភាពជាក់ស្តែង បន្ទាប់មកធ្វើរបាយការណ៍សម្រាប់កិច្ចប្រជុំធំ មុននឹងមានការថ្កោលទោសណាមួយកើតឡើង។ ជាមួយគ្នានេះ រដ្ឋមន្ត្រីក្រសួងវប្បធម៌ ក៏អំពាវនាវឱ្យបណ្ដាប្រទេសទាំងអស់ជារដ្ឋភាគីនៃអនុញ្ញាក្រុងឡាអេ ឆ្នាំ១៩៥៤ មានការរួមគ្នាតែមួយ ដើម្បីថែរក្សាសម្បត្តិបេតិកភណ្ឌពិភពលោកឱ្យបានម៉ឺងម៉ាត់ បន្ទាប់ពីទាហានឈ្លានពានថៃបានប្រើអាវុធធុនធ្ងន់ បាញ់បំផ្លាញប្រាសាទបុរាណខ្មែរ ដូចជាប្រាសាទតាក្របី និងប្រាសាទព្រះវិហារ៕