ថ្លែងក្នុងពិធីប្រកាសដាក់ឱ្យអនុវត្តជាផ្លូវការផែនទីបង្ហាញផ្លូវឆ្ពោះទៅការគ្របដណ្តប់សុខភាពជាសកលនៅកម្ពុជាឆ្នាំ២០២៤-២០៣៥ នាព្រឹកថ្ងៃទី ២៣ ខែ ឧសភា ឆ្នាំ២០២៤ សម្តេចមហាបវរធិបតី ហ៊ុន ម៉ាណែត នាយក រដ្ឋមន្ត្រីនៃព្រះរាជាណាចក្រកម្ពុជា មានប្រសាសន៍ថា ការឃាត់ខ្លួនលោក ស៊ុន ចន្ធី ដោយសារតែលោកបានផ្សាយព័ត៌មានមិនពិត ក្នុងគោលបំណងកេងចំណេញនយោបាយរបស់ខ្លួន ដោយបានចោទមួលបង្កាច់ថា រាជរដ្ឋាភិបាលបានដាក់គោលនយោបាយរើសអើងចំពោះប្រជាពលរដ្ឋ។

សម្តេចធិបតី ហ៊ុន ម៉ាណែត បានបញ្ជាក់ថា ការចោទបំភ្លៃរបស់លោក ស៊ុន ចន្ធី បែបនេះ បានធ្វើឱ្យប្រជាពលរដ្ឋបាត់បង់ជំនឿលើការដឹកនាំរបស់រាជរដ្ឋាភិបាល ហើយអាចឈានដល់បង្កភាពវឹកវរនៅក្នុងសង្គម តាមការជឿពាក្យសម្ដីមិនពិតនេះ។

ជាមួយគ្នានេះ សម្តេចធិបតីក៏បានស្នើទៅមិត្តបរទេសមួយចំនួន កុំឱ្យគាំទ្របុគ្គលមួយចំនួនដែលប្រព្រឹត្តខុសច្បាប់ និងត្រូវមើលឱ្យឃើញថា តើបុគ្គលនោះបានប្រព្រឹត្តកំហុសអ្វី ទើបឈានទៅដល់ការអនុវត្តច្បាប់បែបនេះ៕