នាយករដ្ឋមន្រ្ដី៖ កាតព្វកិច្ចរដ្ឋ និងវិស័យឯកជន ត្រូវសហការគ្នាដោយភាពស្មោះត្រង់ និងអនុលោមភាព
ថ្ងៃទី ៖ 09-05-2024, ដោយ admin , 73 Views
ភ្នំពេញ : សម្ដេចធិបតី ហ៊ុន ម៉ាណែតថ្លែងថាសម្តេចធិបតី៖ កាតព្វកិច្ចរដ្ឋ និងវិស័យឯកជន ត្រូវសហការគ្នាដោយភាពស្មោះត្រង់ និងអនុលោមភាព ព្រោះស្ថាប័នរដ្ឋមិនចង់ដើរតួនាទីជាឆ្មា ហើយវិស័យឯកជាកណ្តុរនោះទេ គឺចង់ឱ្យធ្វើជាឆ្មាទាំងអស់គ្នា។
ថ្លែងក្នុងឱកាសអញ្ជើញជាអធិបតីប្រកាសបើកឱ្យដំណើរការជាផ្លូវការសមាគមសហព័ន្ធអ្នកវិនិយោគកម្ពុជា និងពិសាអាហារសាមគ្គី នៅល្ងាចថ្ងៃទី៩ ខែឧសភា ឆ្នាំ២០២៤នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីព្រះរាជាណាចក្រកម្ពុជា មានប្រសាសន៍ថា វិស័យឯកជនបានចូលរួមចំណែកយ៉ាងសំខាន់ជាមួយរាជរដ្ឋាភិបាលក្នុងការជំរុញកំណើនសេដ្ឋកិច្ចជាតិ ។ ដូច្នេះ កាតព្វកិច្ចវិស័យរដ្ឋ និងឯកជន ត្រូវសហការគ្នាដោយភាពស្មោះត្រង់ និងអនុលោមភាព ដើម្បីធ្វើឱ្យមានសណ្ដាប់ធ្នាប់ មានប្រសិទ្ធភាព និងបរិស្ថានលើវិស័យវិយោគនៅកម្ពុជាប្រកបដោយភាពទាក់ទាញ ហើយផ្ដល់ភាពកក់ក្ដៅជូនអ្នកវិយោគទាំងក្នុង និងក្រៅប្រទេសមានភាពរីកចម្រើន។
សម្តេចធិបតី ហ៊ុន ម៉ាណែត បានបញ្ជាក់ថា ការអនុវត្តន៍ និងគោរពអនុលោមភាព ប្រៀបដូចជាការគោរពច្បាប់ចរាចរណ៍ ដើម្បីសម្រួលដល់ការធ្វើដំណើរបានទាំងអស់គ្នា ហើយសម្តេចមិនចង់ឃើញស្ថាប័នរដ្ឋចាំតែដើរផាក ដើរពិន័យនោះទេ ពោលមិនចង់ឃើញស្ថាប័នរដ្ឋដើរតួនាទីជាឆ្មា ហើយវិស័យឯកជនជាកណ្តុរនោះទេ។
ជាមួយគ្នានេះ សម្តេចធិបតីប្រកាសថា កម្ពុជាបើកជំហរទ្វា គ្រប់អ្នកវិនិយោគបរទេសទាំងអស់ ដែលមានបំណងមកបណ្ដាក់ទុននៅកម្ពុជា។ ទន្ទឹមនឹងនេះ សម្តេចធិបតីក៏ថ្លែងអំណរគុណអ្នកវិនិយោគបរទេស ដែលសម្រេចចិត្ដក្នុងការមកបណ្ដាក់ទុននៅកម្ពុជាផងដែរ៕
|