|
សាលារាជធានីភ្នំពេញ បើក «វគ្គបណ្តុះបណ្តាល ស្តីពីការតាក់តែងលិខិតរដ្ឋបាល »
ថ្ងៃទី ៖ 08-05-2024, ដោយ admin , 70 Views
ភ្នំពេញ : អភិបាលរងរាជធានីភ្នំពេញ លោក កើត ឆែ បានវាយតម្លៃខ្ពស់ចំពោះទីចាត់ការគ្រប់គ្រងធនធានមនុស្ស នៃរដ្ឋបាលរាជធានីភ្នំពេញ ដែលបានរៀបចំវគ្គបណ្តុះបណ្តាលពាក់ព័ន្ធនឹងប្រធានបទ «វគ្គបណ្តុះបណ្តាល ស្តីពីការតាក់តែងលិខិតរដ្ឋបាល » ដើម្បីឱ្យមន្ត្រីរាជការ-មន្ត្រីជាប់កិច្ចសន្យា នៃរដ្ឋបាលរាជធានីភ្នំពេញ រដ្ឋបាលខណ្ឌទាំង១៤ រដ្ឋបាលសង្កាត់ទាំង១០៥ និងតាមមន្ទីរ-អង្គភាពជំនាញ ក្រោមឱវាទរដ្ឋបាលរាជធានីភ្នំពេញ ទទួលបាននូវចំណេះដឹង-ធាតុចូលផ្សេងៗ ពាក់ព័ន្ធនឹងការតាក់តែងលិខិតស្នាមរដ្ឋបាល ដែលជាមធ្យោបាយទំនាក់ទំនងក្នុងទម្រង់លាយលក្ខណ៍អក្សរ រវាងអង្គភាពមួយ ជាមួយអង្គភាពមួយទៀត ឬទំនាក់ទំនងផ្ទៃក្នុងអង្គភាពហើយចំណេះដឹងលើការតាក់តែងលិខិតរដ្ឋបាលនេះ នឹងចូលរួមបង្កើនគុណផលការងាររបស់មន្ត្រី ក្នុងការបំពេញការងាររដ្ឋបាល និងការផ្តល់សេវាសាធារណៈជូនបងប្អូនប្រជាពលរដ្ឋឱ្យកាន់តែរហ័ស និងមានប្រសិទ្ធភាពខ្ពស់។
តំណាង លោក ឃួង ស្រេង អភិបាលរាជធានីភ្នំពេញ លោក កើត ឆែ បានថ្លែងអំណរគុណចំពោះ លោក ស៊ុក សង្វារពេជ្រ នាយករងរដ្ឋបាលសាលរាជធានីភ្នំពេញ និងជាគ្រូឧទ្ទេស នៃវគ្គបណ្តុះបណ្តាល ដែលបានចងក្រងឯកសារសម្រាប់ការធ្វើបទបង្ហាញ ហើយនេះជាលើកទីពីរហើយ ដែលទីចាត់ការគ្រប់គ្រងធនធានមនុស្ស បានរៀបចំវគ្គបណ្តុះបណ្តាលលើប្រធានបទនេះឡើង ដោយលើកទី១ បានរៀបចំកាលពីថ្ងៃទី០៦ ខែកញ្ញា ឆ្នាំ២០២៣ ហើយវគ្គបណ្តុះបណ្តាលលើកនេះក៏នឹងពង្រឹង និងផ្តល់ចំណេះដឹងថ្មីៗបន្ថែមទៀតជូនសមាសភាពចូលរួមទាំងអស់ឱ្យស្របតាមបម្រែបម្រួលបរិយាកាសរដ្ឋបាល។
លើសពីនេះ លោក កើត ឆែ បានជូនពរឱ្យដំណើរការ នៃវគ្គបណ្តុះបណ្តាលដ៏មានសារៈសំខាន់នេះ ទទួលបានជោគជ័យតាមការគ្រោងទុក និងស្នើដល់អ្នកចូលរួមទាំងអស់ត្រូវយកចិត្តទុកដាក់ចូលរួមឱ្យបានពេញលេញ ខិតខំត្រងត្រាប់ទទួលនូវចំណេះដឹង និងបទពិសោធន៍នានា ហើយក្នុងករណីដែលមានចម្ងល់ ត្រូវលើកជាសំណួរដើម្បីស្នើសុំការបកស្រាយ និងត្រូវស្នើសុំឯកសារបន្ថែម ពីលោកគ្រូឧទ្ទេស។
មុននឹងបញ្ចប់ លោកអភិបាលរង ក៏បានសួរដល់សិក្ខាកាមទាំងអស់ពីសំណួរអំពីការគាំទ្រការជីកព្រែកហ្វូណន-តេជោ ហើយក៏ទទួលបានការឆ្លើយលើកដៃគាំទ្រយ៉ាងខ្លាំងក្លា ដូច្នេះខ្ញុំក៏បានស្នើដល់សិក្ខាកាមចូលរួមដូររូបភាព Profile ដោយមានស៊ុមឌីហ្សាញគាំទ្រការជីកព្រែកហ្វូណន-តេជោ នៅក្នុងប្រព័ន្ធបណ្តាញសង្គមនានារបស់ខ្លួន ប្រកបដោយសេចក្តីរីករាយ និងមោទកភាពជាតិ៕
|