កម្លាំងអាជ្ញាធរ កំពុងឡោមព័ទ្ធបុរសម្នាក់ពាក់ព័ន្ធនឹងករណីបាញ់បណ្ដាលឲ្យបុរសម្នាក់កាលពីយប់មិញ
ថ្ងៃទី ៖ 07-05-2024, ដោយ Dara007 , 84 Views
ភ្នំពេញៈ កម្លាំងកងរាជអាវុធហត្ថរាជធានីភ្នំពេញសហការជាមួយកម្លាំងនគរបាលព្រហ្មទណ្ឌ នៃស្នងការដ្ឋាននគរបាលរាជធានីភ្នំពេញកំពុងឡោមព័ទ្ធទីតាំងមួយកន្លែងក្បែរនិងផ្សារសាំហាន់ដើម្បីឃាត់ខ្លួនបុរសម្នាក់ពាក់ព័ន្ធករណីបាញ់បណ្ដាលឲ្យបុរសម្នាក់ទៀតរងរបួសចង្កេះ។ ប្រតិបត្តិការនេះបានធ្វើឡើងនៅវេលាម៉ោង ០៦ល្ងាចថ្ងៃទី០៧ ខែឧសភា ឆ្នាំ ២០២៤ នៅចំណុចផ្សារសាំហាន់ សង្កាត់ទួលសង្កែទី១ ខណ្ឌឫស្សីកែវរាជធានីភ្នំពេញ។
តាមប្រភពព័ត៌មានបានឲ្យដឹងថា ដោយឃើញមានកម្លាំងកងរាជអាវុធហត្ថនិងនគរបាលជាច្រើននាក់ធ្វើការឡោមព័ទ្ធទីតាំងមួយកន្លែងក្បែរនិងផ្សារសាំហាន់ ហើយបានឲ្យដឹងថាកំពុងតែឡោមព័ទ្ធ ដើម្បីឃាត់ខ្លួនបុរសម្នាក់ពាក់ព័ន្ធករណីបាញ់បោះកាលពីយប់មិញ បណ្ដាលឲ្យបុរសម្នាក់ទៀតរងរបួស។ សូមបញ្ជាក់ផងដែរក្នុងរង្វង់ប្រតិបត្តិការនេះកម្លាំងអាជ្ញាធរនៅពុំទាន់ឃាត់ខ្លួនជនសង្ស័យបាននៅឡើយទេដោយសារតែជនសង្ស័យមានអាវុធជាប់នឹងខ្លួនផងដែរ។
គួរបញ្ជាក់ផង កាលពីវេលាម៉ោង១រំលងអធ្រាត្រ ឈានចូលថ្ងៃទី៧ ខែឧសភា ឆ្នាំ២០២៤ មានបុរសម្នាក់បានដកកាំភ្លើងខ្លីបាញ់ជាច្រើនគ្រាប់ចំយុវជនម្នាក់ បណ្តាលឲ្យរងរបួសដោយសារខឹងក្មេងៗលេងឈូសសើចឌឺដង ស្របពេល កំពុងឈ្លោះជាមួយប្រពន្ធ ។ ហេតុការណ៍ខាងលើនេះបានកើតឡើងនៅស្តុប R3 ច្រកចូលបឹងកក់ ក្នុងមូលដ្ឋានសង្កាត់ស្រះចក ខណ្ឌដូនពេញ រាជធានីភ្នំពេញ៕
|