ថ្លែងក្នុងពិធីប្រកាសដាក់ឱ្យអនុវត្តជាផ្លូវការ «ប្រព័ន្ធបញ្ជរតែមួយជាតិ»នាថ្ងៃទី៧ ខែឧសភាឆ្នាំ២០២៤នេះ សម្តេចមហាធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា មានប្រសាសន៍ថាប្រព័ន្ធបញ្ជរតែមួយជាតិនឹងក្លាយទៅជាតួអង្គដ៏សំខាន់មួយនៃប្រព័ន្ធអេកូឡូស៊ីឌីជីថល សម្រាប់ធ្វើធុរកិច្ចដែលធ្វើឱ្យកិច្ចសម្រួលពាណិជ្ជកម្មរបស់កម្ពុជាកាន់តែមានប្រសិទ្ធភាព និងមានលទ្ធផលតភ្ជាប់ទៅនឹងប្រព័ន្ធអេកូឡូស៊ីឌីជីថល សម្រាប់ធុរកិច្ចផ្សេងទៀតក្នុងតំបន់និងលើសកលលោក។

សម្តេចធិបតីរំពឹងថា ប្រព័ន្ធបញ្ជរតែមួយជាតិនឹងក្លាយទៅជាគំរូជោគជ័យមួយថ្មីបន្ថែមទៀត នៃការខិតខំប្រឹងប្រែងរួមគ្នារបស់ក្រសួងស្ថាប័ន នៃរដ្ឋាភិបាលដែលបានជម្នះនូវការលំបាកទាំងឡាយ នៅក្នុងដំណើរការការសម្រុះសម្រួលស្ថាប័ន ដូច្នេះប្រព័ន្ធបញ្ជតែមួយជាតិ គឺអាចចាត់ទុកបានថា ជាជោគជ័យរួមគ្នា នឹងជាសមិទ្ធផលរបស់ក្រសួងស្ថាប័ននៃរាជរដ្ឋាភិបាល ក្នុងការអនុវត្តការងារតាមអភិក្រម គ្រប់រូបភាព នៃប្រព័ន្ធតួអង្គតែមួយ។

ជាងនេះទៅទៀត ការធ្វើការរួមគ្នាប្រកបដោយជោគជ័យ ក៏បានហុចផលឱ្យវិស័យឯកជននឹងទទួលបានផលប្រយោជន៍ជាច្រើន ពីប្រព័ន្ធបញ្ជរតែមួយជាតិ មានជាអាទិ៍ ដូចជាចំណេញពេល កាត់បន្ថយចំណាយជាដើម។ សម្ដេចធិបតីបានបញ្ជាក់ថា ការតភ្ជាប់គ្នាជាខ្សែច្រវាក់ នៃប្រព័ន្ធបច្ចេកវិទ្យាព័ត៌មាន ពីប្រព័ន្ធមួយទៅប្រព័ន្ធមួយទៀតរបស់ក្រសួងស្ថាប័នចំនួន២១តាមរយៈថ្នាល ផ្លាស់ប្តូរទិន្នន័យកម្ពុជា ដែលអនុញ្ញាតឱ្យកម្ពុជាបង្កើតនូវសេវាអេឡិចត្រូនិកជាច្រើនផ្សេងទៀត ដោយកាត់បន្ថយនូវនីតិវិធីស្មុគស្មាញនិងពេលដ៏ច្រើន គួរឱ្យកត់សម្គាល់។

សម្តេចធិបតីបន្ថែមទៀតថា ការកសាងប្រព័ន្ធអេកូឡូស៊ីនៃប្រព័ន្ធបច្ចេកវិទ្យាព័ត៌មានបែបនេះ ពិតជាមានសារៈសំខាន់ ដែលអាចបង្កើតជាគំរូនិងក្របខ័ណ្ឌ ការងារថ្មីមួយទៀត ដែលអាចបង្កើតជាគំរូឬក្របខ័ណ្ឌការងារជាថ្មី ដែលជាមូលដ្ឋានសម្រាប់យកទៅប្រើប្រាស់ក្នុងការលើកស្ទួយបរិយាកាសធុរកិច្ច និងការសម្រួលពាណិជ្ជកម្មក៏ដូចជាការពង្រឹងភាពប្រកួតប្រជែងរបស់កម្ពុជាជារួមតែម្តង៕