សម្តេចធិបតីបានផ្ដល់គោលការណ៍ពាក់ព័ន្ធនឹងការពង្រឹងវិស័យយោធា គឺឱ្យធ្វើវិសោធនកម្មច្បាប់ចំនួន២ ក្នុងនោះមានច្បាប់ កាតព្វកិច្ចយោធាឆ្នាំ ២០០៦ ដែលត្រូវធ្វើរួចរាល់ និងដាក់ឱ្យអនុវត្តនៅឆ្នាំ២០២៦ខាងមុខ និងការធ្វើវិសោធនកម្មនេះ ដើម្បីបង្កើនប្រសិទ្ធភាពក្នុងការបំពេញសាច់ទ័ព ជាពិសេសការបំពេញ ពលទាហានថ្នាក់ក្រោមឱ្យបានគ្រប់គ្រប់គ្រាន់ និងទី២ ការធ្វើវិសោធនកម្មច្បាប់សោធន របស់យោធា ដើម្បីធ្វើឱ្យស្របតាមស្ថានភាពនៃប្រទេសជាតិនាពេលច្ចុប្បន្ន។ សម្តេចធិបតីបានបញ្ជាក់ថា តាមរយៈការធ្វើវិសោធនកម្មច្បាប់កាតព្វកិច្ច និងច្បាប់សោធន របស់យោធានឹងធ្វើឱ្យចំនួនកងទ័ពកម្ពុជាកើនឡើងកាន់តែច្រើន និងកាត់បន្ថយការចំណាយនៅលើវិស័យកងទ័ព។

ជាមួយគ្នានេះ សម្តេចធិបតី បញ្ជាក់ជាថ្មីថា ឆ្លងកាត់ការប្រឈមបញ្ហាថ្មីៗនេះ នឹងធ្វើឱ្យកម្ពុជាឃើញកាន់តែច្បាស់នូវចំណុចខ្លាំង និងចំណុចដែលត្រូវពង្រឹងបន្ថែមលើវិស័យយោធា ហើយការពង្រឹងវិស័យការពារជាតិនេះ គឺត្រូវបន្តធ្វើជាបន្តបន្ទាប់មិនឈប់នោះទេ។

ទន្ទឹមនឹងនេះ សម្តេចធិបតីណែនាំឱ្យក្រសួងការពារជាតិ អគ្គមេបញ្ជាការពិនិត្យមើលគោលការណ៍ពង្រឹងការជ្រើសរើសយោធាចារ្យថ្មី ដោយត្រូវកំណត់ឱ្យបានច្បាស់លាស់ ដើម្បីធានាដល់ការលើកកម្ពស់ការហ្វឹកហ្វឺនកងកម្លាំងកាន់តែមានប្រសិទ្ធខ្ពស់៕