នាឱកាសអញ្ជើញសំណេះសំណាលជាមួយ សមាជិក សមាជិកាក្រុមប្រឹក្សាខេត្ត ក្រុង ស្រុក ឃុំ សង្កាត់ ក្នុងខេត្តព្រះវិហារ នៅថ្ងៃទី២៧ ខែមិថុនា ឆ្នាំ២០២៥ សម្ដេចតេជោ ហ៊ុន សែនមានប្រសាសន៍ថាបញ្ហាជម្លោះព្រំដែនរវាងកម្ពុជា-ថៃដែលបានកើតឡើងជាថ្មីម្តងទៀត កាលពីចុងខែឧសភា សម្ដេចតែងតែចេញមកសម្របសម្រួលដោះស្រាយដោយសន្តិវិធីតាមផ្លូវតុលាការ ដើម្បីស្វែងរកសន្តិភាពធ្វើយ៉ាងណាកុំឲ្យមានសង្គ្រាមកើតឡើង។ ប៉ុន្តែបែរជាមកដល់សព្វថ្ងៃនេះ ភាគីថៃ បានបន្តពង្រីកជម្លោះនេះរីករាលដាលលើគ្រប់វិស័យទៅវិញ។ ចំពោះចំណុចនេះសម្ដេចតេជោបានលើកជាចម្ងល់ថា ថៃបានចោទកម្ពុជាថា កម្ពុជារំលោភអធិបតេយ្យភាពរបស់ថៃ, ចុះហេតុអ្វីថៃមិនប្ដឹងកម្ពុជាទៅកាន់តុលាការយុត្តិធម៌អន្តរជាតិ? ចុះហេតុអ្វីថៃមិនហ៊ានទៅដោះស្រាយនៅតុលាការអន្តរជាតិជាមួយកម្ពុជា?។

សម្ដេចតេជោថ្លែងថា «ថៃ ចោទកម្ពុជា ថាជាអ្នករំលោភអធិបតេយ្យថៃ។ ខ្ញុំ ឆ្ងល់ថា ថៃ បានចោទកម្ពុជាថា រំលោភទៅលើថៃ តែហេតុអី ខ្វះសេចក្ដីក្លាហាន ប្ដឹងកម្ពុជា ទៅតុលាការ ។ ខ្ញុំ សូមចោទសួរអ្នកទីក្រុងបាកកក អ្នកចោទប្រទេសកម្ពុជាថា ជាអ្នករំលោភអធិបតេយ្យថៃ ប៉ុន្តែហេតុអ្វីអ្នកមិនប្តឹងកម្ពុជាទៅកាន់តុលាការអន្តរជាតិ ហើយមិនព្រមឡើងតុលាការជាមួយកម្ពុជា?»។ សូមមិត្តបរទេស ពិចារណាឲ្យបានដិតដល់, ហេតុអ្វីថៃខ្លាចតុលាការ ហើយមិនទៅតុលាការជាមួយកម្ពុជា»។ សម្ដេចតេជោបញ្ជាក់ទៀតថា ទោះបីជាថៃមិនព្រមឡើងទៅតុលាការ ICJ ជាមួយកម្ពុជាក៏ដោយ ប៉ុន្តែកម្ពុជានៅតែបន្តដោះស្រាយជាមួយភាគីថៃដោយសន្តិវិធី និងដោះស្រាយតាមផ្លូវយន្តការច្បាប់អន្តរជាតិ ពោលគឺតុលាការយុត្តិធម៌អន្តរជាតិ ICJ ។

សូមបញ្ជាក់ថា លិខិតផ្លូវការរបស់កម្ពុជាបានបញ្ជូនទៅកាន់តុលាការយុត្តិធម៌អន្តរជាតិ កាលពីថ្ងៃទី១៦ ខែមិថុនា ដើម្បីជួយស្វែងរកដំណោះស្រាយបញ្ហាវិវាទព្រំដែននៅតំបន់ប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំបី ។ បន្ទាប់ពីបានទៅដល់ ត្រូវបានលោកជំទាវ គឹមសួគ៌ សុវណ្ណារី ឯកអគ្គរាជទូតកម្ពុជាប្រចាំប្រទេសហូឡង់ ប្រគល់ដោយផ្ទាល់ដៃជូនលោកក្រឡាបញ្ជី Philippe Gautier នៅតុលាការយុត្តិធម៌អន្តរជាតិ៕