ការរំលេចឡើងដោយប្រធានអង្គភាពអ្នកនាំពាក្យរាជរដ្ឋាភិបាលរូបនេះ គ្រាដែលអង្គភាពអ្នកនាំពាក្យរាជរដ្ឋាភិបាល បានរៀបចំវេទិកាសារព័ត៌មានលើកទី៧ ស្ដីពី «កម្ពុជាឈរកាន់តែរឹងមាំលើឆាកនយោបាយជាតិ តំបន់ និងអន្តរជាតិ» នៅថ្ងៃទី១៩ ខែឧសភា ឆ្នាំ២០២៥។

រយៈពេល ៣ខែ ឆ្នាំ២០២៥ នៃរាជរដ្ឋាភិបាលនីតិកាលទី៧ នៃរដ្ឋសភា ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានបង្ហាញពីស្នាដៃគួរឱ្យស្ញប់ស្ញែង និងសមិទ្ធផលផ្លៃផ្កាជាច្រើនអនេក តាមរយៈកិច្ចខិតខំប្រឹងប្រែងនិងភាពវាងវៃរបស់ថ្នាក់ដឹកនាំ ភាពធន់និងកាន់រឹងមាំរបស់រាជរដ្ឋាភិបាល និងតម្លៃកាន់តែលេចធ្លោរបស់កម្ពុជានៅលើឆាកនយោបាយជាតិ តំបន់ និងអន្តរជាតិ។

លោក តាន់ ហ្សង់ហ្វ្រង់ស័រ រដ្ឋមន្ត្រីប្រតិភូអមនាយករដ្ឋមន្ត្រីទទួលបន្ទុកកិច្ចការការបរទេស និងសហប្រតិបត្តិការអន្តរជាតិ មានប្រសាសន៍ថា៖ «ប្រទេសកម្ពុជាយើងមានសំណាង ដ្បិតកំពុងបន្តគ្របដណ្តប់ដោយសន្តិភាព និងអាចបន្តអភិវឌ្ឍ ខណៈដែលស្ថានភាពសកលនិងតំបន់កាន់តែផុសស្រួយ កាន់តែស្មុគស្មាញ មិនជាក់លាក់ទាល់តែសោះ និងប្រកបដោយគ្រោះថ្នាក់»។

សូមជម្រាបថា នៅរៀងរាល់បីខែម្តង លោក ប៉ែន បូណា និងលោក តាន់ ហ្សង់ហ្វ្រង់ស័រ តែងតែធ្វើបច្ចុប្បន្នភាព ស្តីពី វឌ្ឍនភាពរបស់រាជរដ្ឋាភិបាល នីតិកាលទី៧ នៃរដ្ឋសភា ដើម្បីចែករំលែកព័ត៌មានដល់ប្រជាពលរដ្ឋម្ចាស់ឆ្នោត និងម្ចាស់ប្រទេសឱ្យបានជ្រាប៕