ការស្នើឱ្យធ្វើការកែតម្រូវការចុះផ្សាយលើអគ្គស្នងការរងនគរបាលជាតិឡើងវិញនេះ បន្ទាប់ពីមានការបង្ហោះផ្សព្វផ្សាយព័ត៌មានពី ទំព័រគណនីហ្វេសប៊ុកសារព័ត៌មានឈ្មោះ Prambeytis TV24h ក្នុងខ្លឹមសារ ចោទប្រកាន់មកកាន់ លោកឧត្តមសេនីយ៍ឯក ជា ពៅ អគ្គស្នងការរងនគរបាលជាតិ ក្នុងន័យ មានការយឺតយ៉ាវក្នុងការឆ្លងឯកសារពាក្យបណ្តឹង នៅថ្ងៃទី២៨ ខែមីនា ឆ្នាំ២០២៥ ។

ក្នុងន័យនេះ នាយកដ្ឋានប្រឆាំងបទល្មើសបច្ចេកវិទ្យា សូមធ្វើការបំភ្លឺ និងបដិសេធ នូវការលើកឡើង ដោយគ្មានមូលដ្ឋានរបស់ ទំព័រគណនីហ្វេសប៊ុកសារព័ត៌មានឈ្មោះ Prambeytis TV24h ដែលបានចោទ ប្រកាន់មកកាន់ លោក ឧត្តមសេនីយ៍ឯក ជា ពៅ។

តាមការពិនិត្យបណ្ដឹងដែលជនរងគ្រោះបាន មកដាក់ពាក្យបណ្ដឹងតាមរយៈអ្នកសារព័ត៌មានខាងលើ គឺនៅថ្ងៃទី០៣ ខែមីនា ឆ្នាំ២០២៥ ក្រោយទទួលបាន ពាក្យបណ្ដឹង ជំនាញបានបើកការស្រាវជ្រាវដើម្បីកំណត់មុខសញ្ញាដែលពាក់ព័ន្ធនឹងបណ្តឹងខាងលើ និងឈាន ទៅដល់ការស្នើសុំអនុវត្តបណ្ដឹង នៅថ្ងៃទី២៤ ខែមីនា ឆ្នាំ២០២៥ និងទទួលបានការឯកភាពពី លោក អគ្គស្នងការរង ជា ពៅ នៅថ្ងៃទី២៧ ខែមីនា ឆ្នាំ២០២៥។

នាពេលកន្លងមក នាយកដ្ឋានប្រឆាំងបទល្មើស បច្ចេកវិទ្យា ក៏ដូចជា លោក ឧត្តមសេនីយ៍ឯក អគ្គស្នងការរង ទទួលដឹកនាំការងារនាយកដ្ឋាន តែងតែខិតខំ យកចិត្តទុកដាក់ ក្នុងការទទួលពាក្យបណ្តឹង ពិនិត្យ តាមដាន និងឈានទៅដល់ការបង្ក្រាបបទល្មើសតាមប្រព័ន្ធបច្ចេកវិទ្យាជាច្រើនករណី ដែលផ្ទុយទៅនឹងការបង្ហោះ ផ្សព្វផ្សាយ របស់ទំព័រគណនីហ្វេសប៊ុកសារព័ត៌មានឈ្មោះ Prambeytis TV24h ខាងលើ បណ្តាលឱ្យប៉ះពាល់ដល់កេរ្តិ៍ឈ្មោះ កិត្តិយស លោក ឧត្តមសេនីយ៍ឯក ជា ពៅ យ៉ាងធ្ងន់ធ្ងរ។

ជាមួយគ្នានេះ នាយកដ្ឋានប្រឆាំងបទល្មើសបច្ចេកវិទ្យា ស្នើឱ្យ ទំព័រគណនីហ្វេសប៊ុកសារព័ត៌មានឈ្មោះ Prambeytis TV24h ធ្វើការកែតម្រូវនូវការចុះផ្សាយរបស់ខ្លួនខាងលើ និងសូមធ្វើការសុំទោសជាសាធារណៈជូនចំពោះ លោក ឧត្តមសេនីយ៍ឯក ជា ពៅ អគ្គស្នងការរងនគរបាលជាតិផងដែរ។

នាយកដ្ឋានប្រឆាំងបទល្មើសបច្ចេកវិទ្យា សូមស្វាគមន៍ជានិច្ច ចំពោះការបញ្ចេញនូវមតិរិះគន់ក្នុងន័យស្ថាបនា ដែលឈានទៅរកភាពកាន់តែល្អប្រសើរក្នុងកិច្ចការអនុវត្តការងារ បម្រើប្រជាពលរដ្ឋ៕