លោកឧត្តមសេនីយ៍ឯក ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ បានបញ្ជាក់យ៉ាងខ្លី នៅព្រឹកថ្ងៃទី១៩កុម្ភៈនេះថា «វិន័យកងកំលាំង» ក្រោយពីសួរថា តើខាងស្នងការ ចាត់ការបែបណា ចំពោះរឿង ប៉ះទង្គិចរវាងមន្រ្តីប៉ូលិសខណ្ឌសែនសុខ និងលោកបណ្ឌិត សុខ ទូច ។

ក្នុងចំណោមប៉ូលិសដែលចុះអនុវត្តន៍ចរាចរណ៍ គេសង្កេតឃើញ លោកវរសេនីយ៍ទោ ហឿង វឿន អធិការរងនគរបាល ខណ្ឌសែនសុខ ទទួលផែនចរាចរណ៍ ដែលដឹកនាំកម្លាំងគោលដៅមួយនេះ​ហាក់មានភាពលេចធ្លោរជាងគេ បន្ទាប់ពីអធិការរងរូបនេះ បានយកដៃចង្អុលចំៗមុខ លោក បណ្ឌិត សុខ ទូច ព្រមទាំងប្រើពាក្យ «ភ្លើៗ» ទៅកាន់លោកបណ្ឌិតទៀតផង ។ នេះបើយោងតាមវិដេអូរសកម្មភាពដែលបានបង្ហាញ ។

សម្តេចតេជោ ហ៊ុន សែន អតីតនាយករដ្ឋមន្រ្តី និងសម្ដេចធិបតី ហ៊ុន ម៉ាណែត ជានាយករដ្ឋមន្រ្តី កន្លងទៅ ធ្លាប់បានប្រើពាក្យមួយឃ្លាថា «មន្រ្តី គឺជាខ្ញុំបម្រើរបស់ប្រជាពលរដ្ឋ»។ «យើងមិនមែនជាចៅហ្វាយ របស់ប្រជាជននោះទេ យើងជាខ្ញុំបម្រើ ដ៏ស្មោះត្រង់បំផុតរបស់ប្រជាជន»។

សម្តេចធិបតី ហ៊ុន ម៉ាណែត ធ្លាប់បានមានប្រសាសន៍ថា អ្នកបើកបរទាំងអស់ ត្រូវមានស្មារតីប្រុងប្រយ័ត្ន គោរពច្បាប់ និងបើកបរដោយស្វ័យទទួលខុសត្រូវ​ ដោយមិនត្រូវខ្លាចនគរបាលចរាចរណ៍ចាប់នោះទេ។ ចំពោះវិធានការរឹតបន្តឹងច្បាប់ចរាចរណ៍ និងពិនិត្យជាតិអាកុលនេះ គឺជាការណែនាំជាប្រចាំរបស់ប្រមុខរាជរដ្ឋាភិបាល រដ្ឋមន្រ្តីក្រសួងមហាផ្ទៃ និងអគ្គស្នងការនគរបាលជាតិ។ ហើយស្នងការដ្ឋាននគរបាលរាជធានីភ្នំពេញ ក៏ត្រូវបន្តពង្រឹង ក្រមសីលធម៌ និងវិជ្ជាជីវៈរបស់កងកម្លាំង ឲ្យបានច្រើនថែមទៀត ដើម្បីជៀសវាងបង្កបាតុភាពដូចករណីជាមួយ លោកបណ្ឌិត សុខ ទូច ជាឧទាហរណ៍ស្រាប់ ។

ដោយឡែក សម្រាប់មន្រ្តីនគរបាល អន្តរាគមន៍ដែលបានប្រើកាយវិការរុញច្រានមុខក្រោយ ទៅលើលោកបណ្ឌិត សុខ ទូច ចង់ដួលនោះ ពលរដ្ឋទទូចឲ្យមានការទទួលខុសត្រូវ និងរងការពិន័យនរបស់កងកម្លាំងនគរបាលជាតិ ដោយមិនអាចលើកលែងបានឡើយ៕