ការបញ្ជារបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ថ្ងៃទី២៦ ខែធ្នូ ឆ្នាំ២០២៤នេះ ធ្វើឡើងក្នុងឱកាសអញ្ជើញជាអធិបតីក្នុងពិធីប្រគល់ “វិញ្ញាបនបត្រ និងសញ្ញាបត្រ” ជូនដល់សិស្ស ថ្នាក់វិជ្ជាជីវៈ និងនិស្សិតជ័យលាភី ថ្នាក់បរិញ្ញាបត្ររង ថ្នាក់បរិញ្ញាបត្រ និងថ្នាក់បរិញ្ញាបត្រជាន់ខ្ពស់ នៃសាកលវិទ្យាល័យធនធានមនុស្ស សរុបចំនួន ១,១៥៧ អង្គ/នាក់ ក្នុងនោះ (នារី ៦៩១ នាក់) ដែលពិធីនេះធ្វើឡើងនៅវិទ្យាស្ថានជាតិអប់រំ ខណៈដែលករណីក្មេងទំនើងក្រោយការបង្ក្រាបបានស្ងាត់មួយរយៈ ពេលនេះហាក់បីដូចជាងើបឡើងវិញ ខណៈបច្ចុប្បន្នមានក្មេងទំនើងជាង ២ ពាន់នាក់កំពុងជាប់ឃុំ។

សម្ដេចធិបតីបានណែនាំដល់អាជ្ញាធរ និងកម្លាំងសមត្ថកិច្ចរាជធានី ខេត្តសូមកុំបន្ធូដៃ និងត្រូវអនុវត្ដច្បាប់ឱ្យតឹងរឹងខ្លាំងក្លាបំផុតចំពោះករណីក្មេងទំនើងនេះនៅតាមមូលដ្ឋាន ដើម្បីកែប្រែដល់ក្មេងទំនើងទាំងនោះបាន។ ជាពិសេស ជួយដល់ឪពុកម្ដាយ ដើម្បីតម្រង់ទិសឱ្យកូនៗរបស់គាត់ក្លាយជាធនធានមនុស្សដែលល្អ និងសង្គមត្រូវការ។

ទន្ទឹមនឹងនេះ សម្តេចធិបតី បានប្រកាសថា បើរកឃើញករណីក្មេងទំនើងបង្ហាញសកម្មភាពបទល្មើស ដូចជាដាក់អាវុធតាមម៉ូតូ និងបង្ហោះនៅលើហ្វេកប៊ុក គឺលែងឱ្យធ្វើកិច្ចសន្យាទៀតហើយ គឺត្រូវអនុវត្ដវិធានច្បាប់ ដើម្បីរឹតបណ្ដឹងឱ្យខ្លាំងសម្រាប់កាត់បន្ថយក្មេងទំនើងនៅក្នុងសង្គម។ 

ជាមួយគ្នានេះ សម្តេចធិបតី បានណែនាំឱ្យគ្រប់ខេត្ដនីមួយៗ ត្រូវបញ្ចេញព័ត៌មានបង្ក្រាបក្មេងទំនើងឱ្យបានទូលំទូលាយដល់ប្រជាពលរដ្ឋ ដើម្បីបង្ហាញសម្មភាពបង្ក្រាបនេះឱ្យដូចភ្លៀងរលឹម។

សម្ដេចធិបតីក៏បានណែនាំឱ្យក្រសួងយុត្តិធម៌គួរធ្វើវិសោធនកម្មបន្ថែមទោសទណ្ឌលើករណីនេះបន្ថែមទៀត ប្រសិនបើច្បាប់ដាក់ទោសទណ្ឌចំពោះករណីក្មេងទំនើងនេះបើនៅមានទោសទណ្ឌស្រាលពេក ។

ក្នុងឱកាសនេះ សម្តេចធិបតី ប្រកាសមិនឱ្យលើកលែងករណីក្មេងទំនើងកាប់គ្នានៅស្រុកបាទី ខេត្ដតាកែវនោះឡើយ ព្រោះទង្វើរនេះឃោឃៅដែលមិនអាចលើកលែងបាននោះទេ៕