ថ្លែងក្នុងឱកាសអញ្ជើញជាអធិបតីក្នុងពិធីប្រគល់ “វិញ្ញាបនបត្រ និងសញ្ញាបត្រ” ជូនសិស្សថ្នាក់វិជ្ជាជីវៈ និងនិស្សិតថ្នាក់បរិញ្ញាបត្ររង ថ្នាក់បរិញ្ញាបត្រ ថ្នាក់បរិញ្ញាបត្រជាន់ខ្ពស់ នៃសាកលវិទ្យាល័យធនធានមនុស្ស នាព្រឹកថ្ងៃទី២៦ ខែធ្នូ ឆ្នាំ២០២៤នេះ នៅវិទ្យាស្ថានជាតិអប់រំ សម្តេចមហាបវរធិបតី ហ៊ុន ម៉ាណែត បានលើកឡើងជុំវិញចំណាត់ការដ៏ម៉ឺងម៉ាត់ និងការផ្តល់យុត្តិធម៌សម្រាប់ជនរងគ្រោះ ជុំវិញករណីអតីតឧកញ៉ា ស្រី ស៊ីណា របស់ប្រព័ន្ធតុលាការ ដែលបានចូលទៅបាញ់សម្លាប់គូដណ្តឹងមួយគូរ ស្លាប់យ៉ាងអណោចអធមនៅក្នុងផ្ទះ នៅបុរីប៉េងហួត ហើយត្រូវបានតុលាការផ្តន្ទាទោស ឱ្យជាប់ពន្ធនាគារ៣១ឆ្នាំ និងពិន័យជាប្រាក់ជាង២លាន៥០ម៉ឺនដុល្លារ ផ្តល់ទៅកាន់គ្រួសារជនរងគ្រោះ គឺជាករណីទី១ ខណៈដែលនេះក៏ជាសារសំខាន់មួយ សម្រាប់ជនទាំងឡាយ កុំឱ្យប្រព្រឹត្តខុសបែបនេះ ។

សម្តេចធិបតី បញ្ជាក់ថា ប្រព័ន្ធតុលាការ មិនអាចចេះតែយកនីតិវិធី នៃការដោះស្រាយ មកបង្ហាញនៅលើបណ្តាញសង្គមរហូតនោះទេ ។

សូមបញ្ជាក់ថា សាលាដំបូងរាជធានីភ្នំពេញ កាលពីថ្ងៃទី២៣ ខែធ្នូ ឆ្នាំ២០២៤ បានប្រកាស សម្រេចផ្តន្ទាទោស អតីតឧកញ៉ា ស្រី ស៊ីណា ដែលបាញ់សម្លាប់២នាក់គូដណ្តឹងចំនួន៣១ឆ្នាំ និងបង្គាប់ឲ្យសងសំណង២លានដុល្លារដល់ជនរងគ្រោះ រួមជាមួយសំណង៥០ម៉ឺនដុល្លារផ្សេងទៀត ដល់អ្នករងរបួស៕