សម្តេចធិបតី ហ៊ុន ម៉ាណែត បានជំរុញឱ្យលោកស្រី ចន និម្មល រដ្ឋមន្រ្តីក្រសួងពាណិជ្ជកម្ម បង្កើនសកម្មភាពបន្ថែមទៀត ដើម្បីនាំចេញផលិតផលខ្មែរដែលមានសក្ដានុពលទៅកាន់ទីផ្សាថ្មីៗឱ្យកាន់តែច្រើនបន្ថែមទៀត ។ក្នុងន័យនេះ វិស័យឯកជន ត្រូវយកច្រកសម្រាប់ទីផ្សារបរទេសតាមរយៈបង្កើតទីផ្សារបោះដុំ ដើម្បីទិញកសិផលរបស់កសិកនៅក្នុងស្រុកដែលមានលក្ខណៈស្ដង់ដា ដើម្បីធ្វើការនាំចេញទៅក្រៅប្រទេស។

ជាមួយគ្នានេះ សម្តេចធិបតីក៏បានណែនាំឱ្យក្រសួងពាណិជ្ជកម្មគប្បីបន្តពង្រឹងទីផ្សារចាស់ និងពង្រីកទីផ្សារថ្មី ហើយគប្បីត្រូវខិតខំធ្វើយ៉ាងណា នាំផលិតផលខ្មែរ យកទៅខាងក្រៅឲ្យកាន់តែច្រើន បន្ថែមទៀត ជាមួយនឹងការធានានូវគុណភាព និងប្រសិទ្ធភាព។

ទន្ទឹមនឹងនេះ សម្តេចធិបតី ហ៊ុន ម៉ាណែត បានជំរុញឱ្យក្រសួងពាណិជ្ជកម្មពិនិត្យការកែសម្រួលរចនាសម្ព័ន្ធដឹកនាំឡើងវិញឱ្យបានត្រឹមត្រូវនូវច្បាប់លិខិតបទដ្ឋានគតិយុត្តិ ដែលមានស្រាប់ ដើម្បីអនុវត្តទៅឲ្យមានប្រសិទ្ធភាពខ្ពស់ ហើយគប្បីត្រូវជួបផ្ទាល់ និយាយផ្ទាល់ ជាមួយវិស័យឯកជន ដើម្បីធ្វើយ៉ាងណាធ្វើឲ្យបរិយាកាសពាណិជ្ជកម្ម និងវិនិយោគពីក្រៅប្រទេសមកកម្ពុជាកាន់តែច្រើន ។

ជាមួយគ្នានេះ សម្ដេចធិបតីបានបង្ហាញមោទភាព និងកោតសរសើរចំពោះចំពោះកិច្ចខិតខំប្រឹងប្រែងរបស់ក្រសួងពាណិជ្ជកម្ម និងភាគីពាក់ព័ន្ធ ដែលមានកិច្ចសហការល្អក្នុងការទាក់ទាញអ្នកវិនិយោគិន និងការជំរុញកំណើនពាណិជ្ជកម្មតាមរយៈការនាំចេញទៅទីផ្សារក្នុងតំបន់ និងសកលលោក។

សូមបញ្ជាក់ថា ត្រឹមរយៈពេល១១ ខែ ២០២៤នេះ ទំហំពាណិជ្ជកម្មរបស់កម្ពុជា៥០,៤៦ប៊ីលានដុល្លារអាមេរិក កើនឡើង១៥,៩៥ភាគរយ បើប្រៀបធៀបនឹងឆ្នាំ២០២៣៕