បើតាមមន្រ្តីប៉ូលិស កាលពីថ្ងៃទី២០ ខែវិច្ឆិកា វេលាម៉ោង២១និង១០នាទី កម្លាំងប៉ូលិសបានបើកប្រតិបត្តិការបង្រ្កាបគ្រឿងញៀននៅគោលដៅទី១ គ្រាដែលជនសង្ស័យកំពុងដឹកជញ្ជូនគ្រឿងញៀនតាមរថយន្តចំនួន៣០បេ ទម្ងន់ប្រមាណ៦០០គីឡូក្រាម នៅចំណុខ្ទមអ្នកតា ស្ថិតក្នុងភូមិកំពង់ពោធិ៍ ឃុំកំពង់ស្រឡៅមួយ ស្រុកឆែប ខេត្តព្រះវិហារ បម្រុងនាំទៅខេត្តស្ទឹងត្រែង ។ បន្ទាប់មកនៅថ្ងៃទី២១ក្រោយមួយថ្ងៃ កម្លាំងប៉ូលិសរបស់មន្ទីរប្រឆាំងគ្រឿងញៀនក៍បានសហការបន្តទៅបង្រ្កាបនៅគោលដៅទី២ទៀត នៅចំណុចមុខស្ថានីប្រេងឥន្ទនៈតេលាមេគង្គ ស្ថិតតាមបណ្តោយផ្លូវជាតិលេខ៩ ក្នុងភូមិអូរត្រែល ឃុំថាឡាបរីវ៉ាត់ ស្រុកថាឡាបរីវ៉ាត់ ខេត្តស្ទឹងត្រែង និងឃាត់ខ្លួនជនសង្ស័យ២នាក់ ទី១.ឈ្មោះ ខាំ ឡេហឺ (KHAM LEE HER) ភេទប្រុស អាយុ២៧ឆ្នាំ ជនជាតិឡាវ កាន់លិខិតឆ្លងដែនលេខ P3138543 និងទី២.ឈ្មោះ សាឡាំ ផុន ភេទប្រុស អាយុ៣៣ឆ្នាំ ជនជាតិថៃ ព្រមទាំងចាប់យកវត្ថុតាងជាក់ស្ដែង រួមមានសារធាតុញៀនចំនួន៣០បេ និងរថយន្តចំនួន០១គ្រឿង ម៉ាក TOYTA Hilux Rally ពណ៌ស ពាក់ស្លាកលេខ 2AT-5389 ទូរស័ព្ទចំនួន០២គ្រឿងនិងលិខិតឆ្លងដែន០១ច្បាប់។

ប៉ូលិសបន្តថា ក្រោយបង្រ្កាបបាន២គោលដៅហើយ ប៉ូលិសក៍បន្តទៅគោលដៅទី៣ទៀត នៅវេលាម៉ោង ០៣និង៤០នាទី ថ្ងៃដដែល នៅចំណុចផ្ទះសំណាក់មួយកន្លែង ស្ថិតនៅភូមិរាជានុកូល សង្កាត់ស្ទឹងត្រែង ក្រុង-ខេត្តស្ទឹងត្រែង ពេលនោះសមត្ថកិច្ចបានឃាត់ខ្លួនជនសង្ស័យ២នាក់ បន្ថែមទៀត ទី១.ឈ្មោះ MR. JAROEN SAE LAO ភេទប្រុស អាយុ៣២ឆ្នាំ ជនជាតិថៃ កាន់លិខិតឆ្លងដែនលេខ AC7483332 និងទី២.ឈ្មោះ អៀ ថរ (IA THO) ភេទស្រី អាយុ២៧ឆ្នាំ ជនជាតិឡាវ កាន់លិខិតឆ្លងដែនលេខ P2969632។ រថយន្ត០១គ្រឿង ម៉ាក TOYOTA Hilux Revo ពណ៌ស ពាក់ស្លាកលេខ ភ្នំពេញ 2AS-6505 ទូរស័ព្ទដៃ០២គ្រឿង លិខិតឆ្លងដែន០២ច្បាប់។

បច្ចុប្បន្នជនសង្ស័យចំនួន០៤នាក់ ជនជាតិថៃ០២នាក់ ជនជាតិឡាវ០២នាក់ និងវត្ថុតាងខាងលើ ត្រូវបានបញ្ជូនទៅកាន់មន្ទីរប្រឆាំងបទល្មើសគ្រឿងញៀន ដើម្បីបន្តនីតិវិធី ៕