ទិវាបុណ្យឯករាជ្យជាតិ៩ វិច្ឆិកា បានរំលឹកឱ្យឃើញពីព្រះរាជបេសកកម្មដើម្បីជាតិមាតុភូមិ និងប្រជារាស្ត្រខ្មែរ របស់ព្រះករុណា ព្រះបាទ សម្តេចព្រះនរោត្តម សីហនុ ព្រះបិតាឯករាជ្យជាតិ ព្រះបរមរតនកោដ្ឋ ដែលព្រះអង្គបានលះបង់ព្រះកាយពល និងព្រះបញ្ញាញាណយ៉ាងក្លៀវក្លាបំផុត ធ្វើការតស៊ូ ក្នុងក្របខ័ណ្ឌនៃព្រះរាជបូជណីយកិច្ច ដើម្បីទាមទារឯករាជ្យដ៏ពិតប្រាកដនៅកម្ពុជា ។

នៅក្នុងពិធីបុណ្យឯករាជ្យដ៏មហោឡារឹកនេះ មន្ត្រីរាជការនិងប្រជាពលរដ្ឋទាំងអស់បានសម្តែងការចងចាំជានិច្ចនូវព្រះរាជបូជនីយកិច្ចដ៏មហាឧត្ដុង្គឧត្ដមរបស់ព្រះបរមរតនកោដ្ឋ ក្នុងការទាមទារបាននូវឯករាជ្យជាតិ នៅថ្ងៃ៩ ខែវិច្ឆិកា ឆ្នាំ១៩៥៣ ដោយបានប្ដេជ្ញាដើរតាមមាគ៌ានៃការថែរក្សាបូរណភាពទឹកដី ឯករាជ្យ ក្នុងភាពជាម្ចាស់នៃជោគវាសនាអនាគតរបស់ខ្លួន និងការពារដាច់ខាតនូវការប៉ុនប៉ងណាមួយដែលយាយីដល់សេចក្ដីសុខរបស់ប្រជាជនកម្ពុជា។ លោក ដារត្ន័ ជាមន្ត្រីរាជការនៃក្រសួងដែនដី នគរូបនីយកម្ម និងសំណង់ ដែលបានចូលរួមពិធីបុណ្យឯករាជ្យជាតិ នៅបរិវេណវិមានឯករាជ្យ បានលើកឡើងថា ទិវាបុណ្យឯករាជ្យជាតិ ៩ វិច្ឆិកា បានរំលឹកធ្វើឱ្យប្រជាជនខ្មែរគ្រប់ៗរូបចងចាំជានិច្ច នូវការតស៊ូរបស់ព្រះបរមរតនកោដ្ឋ ដែលព្រះអង្គបានលះបង់ព្រះកាយពល និងព្រះបញ្ញាញាណ តស៊ូក្នុងព្រះរាជបូជនីយកិច្ច ទាមទារឯករាជ្យពេញលេញជូនកម្ពុជា ប្រកបដោយសន្តិវិធី ។

កញ្ញា សុម៉ាធីតា គរុនិស្សិតនៃសាលាមធ្យមសិក្សាគរុកោសល្យមត្តេយ្យមជ្ឈឹម បានបង្ហាញការសប្បាយចិត្ត ព្រោះនេះគឺជាលើកទី១ដែលបានចូលរួមអបអរសាទរពិធីបុណ្យឯករាជ្យជាតិ នៅក្នុងបរិវេណវិមានឯករាជ្យ ។

កញ្ញា បានបន្តទៀតថា បើទោះបីជាព្រះបរមរតនកោដ្ឋបានយាងសោយព្រះទិវង្គតក៏ដោយ ប៉ុន្តែភាពអង់អាចក្លាហាន ការតស៊ូ និងការលះបង់របស់ព្រះអង្គ នៅតែដក់ជាប់ក្នុងបេះដូងរបស់ប្រជាជនខ្មែរគ្រប់ៗរូប ។

គួរបញ្ជាក់ថា ប្រទេសកម្ពុជាតែងតែប្រារព្ធទិវាបុណ្យឯករាជ្យជាតិនេះឡើងជារៀងរាល់ឆ្នាំ ដោយមានព្រះរាជពិធីប្រទានភ្លើងទៀនជ័យ រំឭកគុណអ្នកស្នេហាជាតិ ដែលបានពលីជីវិត ទាមទារឯករាជ្យពីពួកអាណានិគមបារាំង នៅថ្ងៃទី៩ ខែវិច្ឆិកា និងបញ្ចប់នៅថ្ងៃទី១១ វិច្ឆិកា ៕