លោក សេង សុភាព មិនបានបរិយាយពីដំណើរដើមទងដែលឈានដល់ការឃាត់ខ្លួនជនសង្ស័យនោះទេ ដោយលោកជំរុញឱ្យសួរតុលាការ ។ ប៉ុន្តែលោកបានបញ្ជាក់យ៉ាងខ្ចីថា រឿងនេះអាវុធហត្ថបានប្រតិបត្តិការចាប់ពីថ្ងៃទី១៨ ដល់ថ្ងៃទី២១ បន្ទាប់មកក៍បញ្ជូនទៅតុលាការចប់ត្រឹមថ្ងៃទី២៣ កក្កដា ។
អ្នកនាំពាក្យតុលាការខេត្តស្ទឹងត្រែង ឈុំ ស៊ាងហាក់ នៅល្ងាចថ្ងៃពុធនេះ បានប្រាប់ សារព័ត៌មាន Cam Post ថា មនុស្ស៩នាក់ត្រូវបានចៅក្រមស៊ើបសួរសាលាដំបូងខេត្តស្ទឹងត្រែង លោកស្រី នូ ចន្ទសុគន្ធា ចេញដីកាឃុំខ្លួន កាលពីថ្ងៃអង្គារ ទី២៣ កក្កដា បន្ទាប់ពីព្រះរាជអាជា្ញរង លោក ជា សុភ័ក្រចោទពីបទ លួចកាន់កាប់អាវុធកែច្នៃខុសច្បាប់ និងប្រើប្រាស់ដោយខុសច្បាប់នូវសារធាតុញៀន និងជួញដូរចែកចាយប្រើប្រាស់ដោយខុសច្បាប់នូវសារធាតុញៀន ។
បើតាមសមត្ថកិច្ច ក្នុងពេលប្រតិបត្តិការកម្លាំងអាវុធហត្ថបានឡោមព័ទ្ធផ្ទះជនសង្ស័យដែលជាប្រធាន ការិយាល័យនគរបាលប្រឆាំងបទល្មើសគ្រឿងញៀន ខេត្ត ស្ទឹងត្រែង នៅផ្លូវទំនប់បេតុង ភូមិរាជានុកូល២ សង្កាត់ស្ទឹងត្រែង ក្រុងស្ទឹងត្រែង។
យោងទៅតាមចម្លើយសារភាព របស់ជនសង្ស័យក្នុងករណីលួចនិងកាត់ខ្សែភ្លើងនិងប្រើប្រាស់គ្រឿងញៀន ចម្លើយសារភាពទាំងនោះក៏មានការពាក់ព័ន្ធអនុប្រធានការិយាល័យប្រឆាំងបទល្មើសគ្រឿងញៀនចំនួនពីរនាក់ទៀតផង។
បន្ទាប់ការឃាត់ខ្លួនប្រធានការិយា ល័យប្រឆាំងបទល្មើសគ្រឿងញៀនរួមអនុប្រធា ន២នាក់ កម្លាំងសមត្ថកិច្ច កងរាជអាវុធហត្ថខេត្តស្ទឹងត្រែង ក៍បានបន្តនីតិវិធីក្នុងការស្រាវជ្រាវស៊ើប អង្កេតយ៉ាងហ្មត់ចត់រយៈពេលបីថ្ងៃ ដើម្បីជៀសវាងប៉ះពាល់ដល់កិត្តិយសពួកគេ ។ ក្នុងករណីនេះ សមត្ថកិច្ចរឹបអូសវត្ថុតាងរួមមាន ៖ ប្រាក់ដុល្លារសុទ្ធចំនួន ៤ម៉ឺនដុល្លារ(បួនម៉ឺនដុល្លារ)ប្រាក់ដុល្លារក្លែងក្លាយ(លុយសែន)ចំនួន ១៧៨.១០០ដុល្លារ(ដប់ប្រាំពីម៉ឺនប្រាំបីពាន់មួយរយដុល្លា)គ្រឿងគៀនចំនួន ៣,១៧ក្រាម ទូរស័ព្ទដៃ៥គ្រឿង រថយន្តម៉ាកហាយឡិនឌ័រ១គ្រឿង និង អាវុធខ្លី១ដើម គ្រាប់៣៤គ្រាប់៕