ការប្រកាសនេះធ្វើឡើងក្នុងការបកស្រាយអំពី បញ្ហាទាក់ទិនទៅនឹងក្របខណ្ឌកិច្ចសហប្រតិបត្តិការអភិវឌ្ឍន៍តំបន់ត្រីកោណ កម្ពុជា-ឡាវ-វៀតណាម ( CLV DTA ) នៅរសៀលថ្ងៃទី២៣ ខែកក្កដា ឆ្នាំ២០២៤នេះ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជាបានអះអាងថា កម្ពុជានឹងមិនអត់ឱនឱ្យជនណាម្នាក់ ដែលបង្កើតភាពវឹកវរ និងចលាចលដល់សន្ដិភាពរបស់កម្ពុជាឡើយ ពីព្រោះកម្ពុជាទម្រាំស្វែងរកសន្ដិភាពបាន គឺមានការលំបាកណាស់។
សម្តេចតេជោ ហ៊ុន សែន បានបញ្ជាក់ថា ដរាបណាសម្តេចនៅមានជីវិត គឺសម្តេចមិនអនុញ្ញាតឲ្យមានអំពើបះបោរណាមួយនោះឡើយ បន្ទាប់ពីសម្ដេចហ៊ានលះបង់អំណាចរបស់ខ្លួនទៅឱ្យក្មេងជំនាន់ក្រោយដឹកនាំប្រទេសអស់ជិតរយៈពេល១ឆ្នាំ គឺដើម្បីសន្ដិភាព និងការអភិវឌ្ឍជាតិ និងការពារផលប្រយោជន៍ជូនប្រជាពលរដ្ឋតែប៉ុណ្ណោះ។
សម្ដេចតេជោបន្ដថា ទោះបីជាសម្ដេចផ្ទេរដំណែងជាប្រធានព្រឹទ្ធសភាក៏ដោយ ក៏ សម្ដេចនៅតែមានអំណាចធ្វើកិច្ចការងារនយោបាយ និងជួយជាតិ តែមិនលូកដៃចូលកិច្ចការរបស់នាយករដ្ឋមន្រ្ដីនោះឡើយ។
ជាមួយគ្នានេះ សម្ដេតេជោប្រកាសឱ្យជនទាំងឡាយដកខ្លួនជាបន្ទាន់ មុនពេលសមត្ថកិច្ចអនុវត្ដផ្លូវច្បាប់ ព្រោះគ្មានការយោគយល់ និងលើកលែងនោះទេ។ ទន្ទឹមនឹងនេះ សម្តេចតេជោ ហ៊ុន សែន ក៏ស្នើឱ្យជនទាំងឡាយ កុំប្រមាថប្រទេសខ្លួន ព្រះមហាក្សត្រ និងប្រជាជនរបស់ខ្លួនឱ្យសោះ ៕