ថ្លែងក្នុងសន្និបាតបូកសរុបលទ្ធផលការងារប្រចាំឆមាសទី១ និងទិសដៅការងារឆមាសទី២ ឆ្នាំ២០២៤ នៅថ្ងៃទី១៩ ខែកក្កដានេះ លោកស្រី ជា សិរី ទេសាភិបាលធនាគារជាតិនៃកម្ពុជា មានប្រសាសន៍ថា នៅពេលភ្ញៀវទេសចរអន្តរជាតិមកដល់កម្ពុជា គឺពួកគេអាចដោនឡូតកម្មវិធីបាគង(App) បើទោះបីជាមិនទាន់មានគណនីធនាគារនៅក្នុងប្រទេសកម្ពុជាក៏ដោយ ក៏អាចប្រើក្រេឌីតកាត ដែលមានពីប្រទេសរបស់ខ្លួនដូចជា៖ VISA Card, Master Card, Union Pay ជាដើម។
លោកស្រីបានបញ្ជាក់ថា គម្រោងនៃការដាក់ឱ្យប្រើប្រព័ន្ធបាគងសម្រាប់ភ្ញៀវទេសចរអន្តរជាតិនេះ បន្ទាប់ពីប្រមុខរាជរដ្ឋាភិបាល បានណែនាំឱ្យធនាគារជាតិនៃកម្ពុជាធ្វើការជាមួយធនាគារពាណិជ្ជ ក្នុងការកែសម្រួលលក្ខខណ្ឌ ទទួលយកប្រាក់ដុល្លារអាមេរិក ដែលខ្ទេច មានស្នាមប្រឡាក់តិចតួច ឬក៏មាន រហែកតិចតួច ធ្វើការប្ដូរជូនដល់ភ្ញៀវទេសចរអន្តរជាតិ ដើម្បីលើកទឹកចិត្តដល់ភ្ញៀវទេសចរដែលមកកម្សាន្តនៅកម្ពុជា បន្ទាប់ពីមានព័ត៌មានថា ភ្ញៀវទេសចរមានការ រអ៊ូរទាំចំពោះការចាយប្រាក់ដុល្លារ ក្នុងការធ្វើទេសចរនៅខេត្តសៀមរាប។
សូមបញ្ជាក់ថា សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា កាលពីម្សិលមិញ បានណែនាំឱ្យមានការដោះស្រាយរូបិយបណ្ណចាស់ ទក់ រហែកជាបន្ទាន់ ដែលនាំឲ្យប៉ះពាល់ដល់សតិអារម្មណ៍របស់ភ្ញៀវទេសចរ ៕