យោងតាមព្រះរាជក្រឹត្យ លោក នាង ម៉ៅ ដែលជារដ្ឋលេខាធិការ ក្រោមឱវាទរាជរដ្ឋាភិបាលកម្ពុជា នីតិកាលទី៧ នៃរដ្ឋសភា ទទួលបានការត្រាស់បង្គាប់ផ្ទេរ និងតែងតាំងមុខតំណែងពីរដ្ឋលេខាធិការ ក្រសួងប្រៃសណីយ៍ និងទូរគមនាគមន៍ មកជារដ្ឋលេខាធិការ ក្រសួងទេសចរណ៍ ដោយព្រះរាជក្រឹត្យលេខ នស/រកត/០៥២៤/៥២៨ ចុះថ្ងៃទី៣១ ខែឧសភា ឆ្នាំ២០២៤ ក្រោយទទួលបានការតែងតាំងមុខតំណែងជា រដ្ខលេខាធិការ ក្រសួងប្រៃសណីយ៍ និងទូរគមនាគមន៍ នៅថ្ងៃទី២៥ ខែឧសភា ឆ្នាំ២០២៤ ទំនងមិនទាន់បានចូលកាន់មុខតំណែងស្រួលបួលផង ។
គួររម្លឹកជូនថា ក្រោយការបង្កើតរាជរដ្ឋាភិបាលកម្ពុជា នីតិកាលទី៧ នៃរដ្ឋសភា ភ្លាមៗ លោក នាង ម៉ៅ ទទួលបានការត្រាស់បង្គាប់តែងតាំងមុខតំណែងជា អនុរដ្ឋលេខាធិការ ក្រសួងប្រៃសណីយ៍ និងទូរគមនាគមន៍ ដំណាលគ្នាជាមួយ លោក លោកស្រី ចំនួន២៨រូបផ្សេងទៀត ដោយព្រះរាជក្រឹត្យលេខ នស/រកត/០៨២៣/២០០៧ ចុះថ្ងៃទី២២ ខែសីហា ឆ្នាំ២០២៣ ។ រយៈពេលមិនដល់១ឆ្នាំក្រោយមក លោក នាង ម៉ៅ ក៏ទទួលបានការត្រាស់បង្គាប់តែងតាំងមុខតំណែងជា រដ្ឋលេខាធិការ ក្រសួងប្រៃសណីយ៍ និងទូរគមនាគមន៍ ដោយព្រះរាជក្រឹត្យលេខ នស/រកត/០៥២៤/៤៩៨ ចុះថ្ងៃទី២៥ ខែឧសភា ឆ្នាំ២០២៤ ។
សរុបសេចក្ដីមក ក្នុងរយៈពេលមិនដល់១ឆ្នាំផង លោក នាង ម៉ៅ ទទួលបានព្រះរាជក្រឹត្យរហូតដល់ទៅចំនួន៣ ពាក់ព័ន្ធនឹងការតែងតាំង និងផ្ទេរមុខតំណែងក្រោមឱវាទរាជរដ្ឋាភិបាលកម្ពុជា នីតិកាលទី៧ នៃរដ្ឋសភា មានសម្ដេចមហាបវរធិបតី ហ៊ុន ម៉ាណែត ជាប្រមុខ ៕