ថ្លែងប្រាប់អ្នកសារព័ត៌មានក្នុងកម្មវិធីទស្សនកិច្ចសិក្សាសម្រាប់ក្នុងស្រុកទៅលើការអនុវត្តកសិអេកូឡូស៊ីនៅខេត្តបាត់ដំបង នាព្រឹកថ្ងៃទី០៦ ខែកក្កដា ឆ្នាំ២០២៤ សមាគមន៍និរន្ដរភាពដីដើម្បីជីវិត (SSLA) លោក នឹម ឈៀង ប្រជាពលរដ្ឋរស់នៅភូមិស្ដីក្រោម ឃុំរហាសួង ស្រុកឯកភ្នំ ខេត្ដបាត់ដំបងបានបង្ហាញជំហររក្សាព្រៃលិចទឹក និងធ្វើសិកម្មជាអេកូឡូស៊ី ដើម្បីលើកកម្ពស់បរិស្ថាន និងសុខុមាលភាពមនុស្សសត្វកាន់តែល្អប្រសើរ។ 

លោកបានបញ្ជាក់ថា ការបង្ហាញជំហររក្សាព្រៃលិចទឹក និងធ្វើសិកម្មជាអេកូឡូស៊ីនេះ ដោយមើលឃើញបច្ចុប្បន្ននេះ មានការទន្រ្ទានព្រៃ និងប្រើប្រាស់ថ្នាំគីមីខ្លាំង ដែលធ្វើឱ្យធម្មជាតិប្រែប្រួល និងប៉ះពាល់ដល់ជីវៈចម្រុះ។

លោកបន្ថែមថា ការថែរក្សារជំហរនេះ បានធ្វើឱ្យសុខភាពក្នុងគ្រួសារមិនឈឺស្កាត់ និងមិនប្រើប្រាស់ថ្នាំស្ទើរតែទាំងស្រុងក្នុង១ឆ្នាំៗ ដោយសារការបរិភោគបន្លែ ត្រី សាច់ ការចិញ្ចឹម ដាំដុះ ដោយខ្លួនឯង ជាពិសេស ជួយផ្គត់ផ្គង់ស្បៀង និងផ្ដល់ប្រាក់ចំណូលក្នុងគ្រួសារកាន់តែធូរធា ម្យ៉ាងវិញទៀត ការធ្វើកសិកម្មអេកូឡូស៊ី ដាំដំណាំចម្រុះ តាមបែបធម្មជាតិជួយអភិរក្សដីឱ្យមានជីជាតិ ជារៀងរហូតផងដែរ៕