ថ្លែងក្នុងឱកាសពិធីពិសាអាហារសាមគ្គី និងបំពាក់គ្រឿងឥស្សរិយយស ជូនលោកគ្រូ អ្នកគ្រូ សិល្បករ និងសិល្បការិនី នៅមជ្ឈមណ្ឌលពិព័រណ៍ និងសន្និបាតកោះពេជ្រ នារសៀលថ្ងៃទី២៥ ខែមេសា ឆ្នាំ២០២៤ សម្តេចធិបតី ហ៊ុន ម៉ាណែត បានថ្លែងថា «ពេលបុណ្យចូលឆ្នាំនេះ ខ្ញុំសប្បាយចិត្ដ ហើយខ្ញុំមានការរំភើប នៅការចូលរួមលេងល្បែងប្រជាប្រិយយើង គឺគ្រប់កន្លែងទាំងអស់ នៅតាមបណ្ដាស្រុក បណ្ដាក្រុង គឺមានការរៀបចំ ជំរុញការលេងល្បែងប្រពៃណី»។

ទន្ទឹមគ្នានេះ សម្តេចធិបតី ហ៊ុន ម៉ាណែត បានលើកឡើងថា ការជំរុញឲ្យមាន ការលេងល្បែងប្រជាប្រិយឡើងវិញ នៅគ្រប់ទីកន្លែងនេះ គឺជាសន្ទះផុសផុល, ជាសញ្ញាវិជ្ជមាន, ជាកត្ដាចំបាច់ ក្នុងការថែរក្សាវប្បធម៌ ដោយសារប្រជាជននៅបន្ដគាំទ្រ បន្ដប្រើប្រាស់ និងបន្ដអនុវត្ដ។ សម្តេចធិបតី ហ៊ុន ម៉ាណែត បានថ្លែងថា ការបំផុតស្មារតី ឲ្យមានការចូលរួមលេងល្បែងប្រជាប្រិយ គឺល្អ។

សម្ដេចធិបតី ហ៊ុន ម៉ាណែត បានបញ្ជាក់ថា ការថែរក្សាវប្បធម៌មិនមែន ជាកាតព្វរបស់បុគ្គលរូបណានោះទេ គឺវប្បធម៌ដើម្បីទាំងអស់គ្នា ហើយទាំងអស់គ្នា ដើម្បីវប្បធម៌។ 

សូមបញ្ជាក់ថា ការរៀបចំ ពិធីបុណ្យចូលឆ្នាំថ្មី ប្រពៃណីជាតិ នៅឆ្នាំនេះ រៀបចំបានល្អ បង្កភាពសប្បាយរីករាយ ជូនប្រជាពលរដ្ឋនៅគ្រប់ទីកន្លែង។ ដោយឡែក បញ្ហាអសន្តិសុខ និងការបង្កហិង្សានានា ថយចុះប្រមាណ ៣០ភាគរយ។ យោងតាមរបាយការណ៍ បានបង្ហាញថា នៅទូទាំងប្រទេសកម្ពុជា ទទួលបានភ្ញៀវទេសចរសរុបជាង ២១.៨១លាននាក់ ក្នុងឱកាសបុណ្យចូលឆ្នាំថ្មី រយៈពេល៤ថ្ងៃ ចាប់ពីថ្ងៃទី១៣-១៦ ខែមេសា ឆ្នាំ២០២៤។
ក្នុងចំណោមភ្ញៀវទេសចរសរុបទាំងជាង ២១លាននាក់នោះ មានភ្ញៀវទេសចរជាតិ និងប្រជាពលរដ្ឋប្រមាណ ២១.៧០លាននាក់ និងទេសចរបរទេសប្រមាណ ១១ម៉ឺននាក់៕