លោក រស់ សុខ ប្រធានមន្ទីរទេសចរណ៍ខេត្តកំពង់ស្ពឺបានឱ្យដឹងថា ភ្ញៀវទេសចរសរុបដែលបានមកស្នាក់នៅនិងដើរលេងកម្សាន្តនៅតាមសហគមន៍ទេសចរណ៍និងក្នុងព្រឹត្តិការណ៍សង្ក្រាន្តមានប្រមាណ២៧០,៤៦៥នាក់ក្នុងនោះភ្ញៀវជាតិ ២៧០,១៨០នាក់និងភ្ញៀវអន្តរជាតិ២៨៥នាក់ផងដែរ។
លោក រស់ សុខ បានបញ្ជាក់បន្ថែមថាក្នុងចំណោមភ្ញៀវទេសចរទាំង២៧០,៤៦៥នាក់ខាងលើ ភ្ញៀវទេសចរណ៍មកលេងព្រឹត្តិការណ៍កំពង់ស្ពឺសង្ក្រាន្តមានចំនួន ២៥៩,៨៤០នាក់ក្នុងនោះភ្ញៀវជាតិ២៥៩,៧៨២នាក់ និងភ្ញៀវអន្តរជាតិ៥៨នាក់និងភ្ញៀវទេសចរតាមរមណីយដ្ឋាន សហគមន៍ទេសចរណ៍មានចំនួន១០,៣៤០នាក់។
ប្រធានមន្ទីរទេសចរណ៍ខេត្តកំពង់ស្ពឺបានគូសបញ្ជាក់បន្ថែមថា សម្រាប់ព្រឹត្តិការណ៍កំពង់ស្ពឺសង្ក្រាន្តឆ្នាំថ្មីនេះ ឆ្នាំ២០២៤ រដ្ឋបាលខេត្តកំពង់ស្ពឺ លោក វ៉ី សំណាង បានរៀបចំឱ្យមានល្បែងប្រជាប្រិយជាច្រើនប្រភេទ ដែលរៀបចំដាច់ដោយឡែកពីគ្នាដើម្បីឱ្យបងប្អូនប្រជាពលរដ្ឋនិងយុវជន យុវនារី ភ្ញៀវទេសចរណ៍ជាតិ អន្តរជាតិអាចបានចូលរួមលេងកម្សាន្តនិងសប្បាយរីករាយទៅតាមចំណង់ចំណូលចិត្ត ហើយក្នុងនោះដែរក៏មានការរៀបចំ ការប្រកួតទាញព្រ័តយក្ស ប្រកួតកីឡាធ្លាក់ទឹក និងប្រកួតសំនៀងឯក ដើម្បីទទួលបានពានរង្វាន់ពីរដ្ឋបាលខេត្តផងដែរ៕