យោងតាមការជូនដំណឹងផ្លូវការពីស្ថាប័នកាសែតភ្នំពេញប៉ុស្តិ៍ នៅថ្ងៃទី១ ខែមីនា ឆ្នាំ២០២៤ បានបញ្ជាក់ថា កាសែតភ្នំពេញប៉ុស្តិ៍ បានបន្តធ្លាក់ចុះយ៉ាងខ្លាំង ពាក់ព័ន្ធចំណូលផ្សាយពាណិជ្ជកម្ម ចាប់តាំងពីមានវិបត្តិកូវីដ១៩ និងស្ថានភាពសេដ្ឋកិច្ចជាតិថមថយក្រោយកូវីដ១៩ ។
ការជូនដំណឹងដដែលបានបញ្ជាក់ថា ម្យ៉ាងទៀតគឺវិវត្តយ៉ាងឆាប់រហ័សនៃប្រព័ន្ធបច្ចេកវិទ្យានិងការផ្សព្វផ្សាយព័ត៌មានតាមបណ្តាញសង្គម ទើបធ្វើឱ្យក្រុមហ៊ុនប្រឈម នឹងបញ្ហាហិរញ្ញវត្ថុយ៉ាងធ្ងន់ធ្ងរ។ ម្ចាស់ភាគហ៊ុនបានខិតខំបណ្តាក់ទុនបន្ថែមនិងរកគ្រប់មធ្យោបាយដើម្បីស្ដារស្ថានភាព និងបង្កើនប្រាក់ចំណូល សម្រាប់ទ្រទ្រង់ដំណើរការក្រុមហ៊ុន និងបន្តការបោះពុម្ពផ្សាយកាសែតភ្នំពេញប៉ុស្តិ៍ដែលជាសារព័ត៌មានឯករាជ្យ វិជ្ជាជីវៈ និងមានអាយុកាលជាង ៣០ឆ្នាំ ប៉ុន្តែនៅតែមិនអាចទ្រទ្រង់ការខាតបង់បន្តទៀតបាន ហេតុនេះម្ចាស់ភាគហ៊ុន បានសម្រេចដោយសេចក្តីសោកស្តាយ បញ្ឈប់ការបោះពុម្ពផ្សាយកាសែតភ្នំពេញប៉ុស្តិ៍ទាំងភាសាខ្មែរ និងភាសាអង់គ្លេស ត្រឹមថ្ងៃទី២៩ ខែមីនា ឆ្នាំ២០២៤។
អ្នកសារព័ត៌មានអាជីពល្បីៗជាច្រើនបានបង្ហាញការសោកស្ដាយចំពោះការបិទកាសែតភ្នំពេញប៉ុស្តិ៍ បន្ទាប់ពីកាសែតរស្មីកម្ពុជា បានបិទការផ្សាយទាំងស្រុង ។
សូមជម្រាបថា បច្ចុប្បន្ននេះ កាសែតធំៗដែលបោះពុម្ពផ្សាយនៅសល់តែពីរស្ថាប័នប៉ុណ្ណោះ ទី១ គឺកាសែត កោះសន្តិភាព និងទី២ គឺកាសែត ខ្មែរថាមស៍ ។ ក្រៅពីនោះមានតែសារព័ត៌មានបែបឌីជីថលប៉ុណ្ណោះ ពោលគឺគេហទំព័រដែលដំណើរការមកដល់បច្ចុប្បន្ន ៕