ថ្លែងក្នុងពិធីប្រកាសដាក់ឱ្យអនុវត្តជាផ្លូវការ«គោលការណ៍ណែនាំស្ដីពីក្របខណ្ឌកម្មវិធីជាតិជំនួយសង្គមក្នុងកញ្ចប់គ្រួសារ និងគោលការណ៍ណែនាំស្ដីពីក្របខណ្ឌកិច្ចគាំពារសង្គមឆ្លើយតបនឹងគ្រោះអាសន្ន» នាថ្ងៃទី៥ ខែធ្នូ ឆ្នាំ២០២៣លោក ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា បានឱ្យដឹងថា កម្មវិធីផ្ដល់ជំនួយជាថវិកាដើម្បីជួយដល់ពលរដ្ឋដែលរងផលប៉ះពាល់ជីវភាព ដោយសារវិបត្តិកូវីដ-១៩ នឹងត្រូវបញ្ចប់នៅដំណាច់ខែមីនា ឆ្នាំ២០២៤ ខាងមុខនេះ ។

ទន្ទឹមនឹងនេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានបញ្ជាក់ច្បាស់ៗថា ទោះកម្មវិធីជំនួយសង្គមមួយចំនួនត្រូវបិទបញ្ចប់ក្ដី ក៏រាជរដ្ឋាភិបាលនៅតែបន្តជួយដល់ពលរដ្ឋ ដែលរងគ្រោះដោយវិបត្តិនានាដដែល តាមរយៈការដាក់ចេញនូវកម្មវិធីជាតិជំនួយសង្គមនានា។

សម្ដេចមហាបវរធិបតី បន្ថែមថា ក្នុងអំឡុងពិភពលោកប្រឈមនឹងវិបត្តិនានា រាជរដ្ឋាភិបាលកម្ពុជា បានចំណាយថវិកា ដើម្បីឧបត្ថម្ភសាច់ប្រាក់ជូនពលរដ្ឋក្រីក្រ ដើម្បីលំនឹងជីវភាពប្រចាំថ្ងៃចាប់ពីខែមិថុនា ឆ្នាំ២០២០ ដល់ថ្ងៃទី២៤ ខែមិថុនា ឆ្នាំ២០២៣ បានចំនួន ១៥ ជុំ ស្មើនឹង ៤០ លើក និងចំណាយថវិកាអស់ជាងមួយពាន់លានដុល្លារអាមេរិកផងដែរ៕