ក្នុងឱកាសអញ្ជើញជាអធិបតីបិទពិធីបុណ្យសមុទ្រលើកទី១០ ជុំទី៣ ក្រោមប្រធានបទ «ទាំងអស់គ្នាដើម្បីទេសចរណ៍» នៅខេត្តកែប នៅល្ងាចថ្ងៃអាទិត្យទី៣ ខែធ្នូ ឆ្នាំ២០២៣ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា មានប្រសាសន៍ថា រាជរដ្ឋាភិបាលមានផែនការសម្រាប់អភិវឌ្ឍន៍ទេសចរណ៍ខេត្តកែបនៅឆ្នាំ២០២៣-២០៤៥ ដោយបានកំណត់ចក្ខុវិស័យ ប្រែក្លាយខេត្តកែប ជាទេសចរណ៍ធម្មជាតិ និងសមុទ្រសម្រាកកម្សាន្តបែបកម្រិតខ្ពស់។

សម្ដេចធិបតី បានជំរុញឱ្យអភិបាលខេត្តកែប បន្តរៀបចំទីតាំងនៅតាមបណ្តោយឆ្នេរប្រឡែង២៧០០ម៉ែត្រ ទៅជាសួនច្បារ ដើម្បីផលផលប្រយោជន៍សាធារណៈ ដែលអាចនឹងបង្កើតសក្តានុពលសម្រាប់ខេត្តកែបបន្ថែមទៀត ។

សម្តេចបន្ថែមថា ការអភិវឌ្ឍន៍ទាំងនេះបានផ្តល់ផលប្រយោជន៍ដល់ប្រជាពលរដ្ឋខេត្តកែបទាំងមូល និងបានចែកផលលាភទៅដល់ប្រជាពលរដ្ឋនៅមូលដ្ឋាន។

សម្តេចធិបតីក៏បានកោតសរសើរចំពោះលោក សោម ពិសិដ្ឋ អភិបាលខេត្តកែប ដែលបានខិតខំនៅក្នុងកិច្ចការកសាង អភិវឌ្ឍន៍ ការរៀបចំសោភណ្ឌភាព និងបរិស្ថាននៅក្នុងខេត្តកែបឱ្យមានភាពស្រស់ស្អាត ដែលនាំឱ្យខេត្តកែបទទួលបានជ័យលាភីពានរង្វាន់ថ្នាក់ជាតិ ថ្នាក់តំបន់ ជាបន្តបន្ទាប់៕