សម្តេចមហាបវរធិបតីមានប្រសាសន៍ថា ព្រឹត្ដការណ៍កីឡាស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ដែលជាព្រឹត្ដការណ៍ដែលកម្ររណាស់របស់កម្ពុជា ដែលមានការទាក់ទាញអារម្មណ៍ និងគាំទ្រពីប្រជាពលរដ្ឋនៅទូទាំងប្រទេសក្នុងពេលតែមួយ។

ការថ្លែងរបស់សម្តេចមហាបវរធិបតី ហ៊ុន ម៉ាណែត នាយក រដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ជាឧត្តម ភរិយា អញ្ជើញជាអធិបតីក្នុងពិធីអបអរសាទរជោគជ័យនៃការរៀបចំការប្រកួត កីឡាស៊ីហ្គេមលើកទី៣២ និងអាស៊ានប៉ារ៉ា ហ្គេមលើកទី១២ ដែលរៀបចំឡើង នៅពហុកីឡដ្ឋានជាតិមរតកតេជោ នាល្ងាចថ្ងៃ ទី១៧ ខែវិច្ឆិកា ឆ្នាំ២០២៣នេះ ។

សម្តេចមហាបវរធិបតីបានបញ្ជាក់ថា កីឡាដែលមានការគាំទ្រ ដែលពលរដ្ឋមិនដែលស្គាល់ហើយ ចាប់ផ្ដើមតាមដាន គឺជាពិសេសហើយ ។ជាក់ស្ដែង ព្រឹត្ដការណ៍បើក និងព្រឹត្ដការណ៍ប្រគួត គឺប្រជាពលរដ្ឋភាគច្រើនបានតាមដាន និងមើល។

សម្តេចមហាបវរធិបតីបញ្ជាក់ទៀតថា ការគាំទ្រ និងចាប់អារម្មណ៍នេះ គឺបានបង្ហាញអំពីមោទនៈភាព ដែលប្រជាពលរដ្ឋកម្ពុជាបានរួមគ្នា ដើម្បីភាពជោគជ័យ និងសមិទ្ធផលរួមរបស់កីឡាស៊ីហ្គេមលើកទី៣២ និងអាស៊ានប៉ារ៉ា ហ្គេមលើកទី១២ ដែលកម្ពុជាធ្វើជាម្ចាស់ផ្ទះទទួលបានជោគជ័យ ។

ជាមួយគ្នានេះ សម្តេចមហាបវរធិបតីបានកោតសរសើរ និងវាយតម្លៃខ្ពស់ចំពោះការខិតខំប្រឹងប្រែង និងសមិទ្ធផលជាច្រើន ក្នុងការរៀចំព្រឹត្ដការណ៍ទាំងពីរនេះ បានសម្រេចដ៏ត្រជះត្រចង់ ដើម្បីបង្ហាញនៅលើឆាកអន្ដរជាតិ និងនៅពិភពលោកផងដែរ៕