អ្នកឧកញ៉ា វិន ហួរ បានលើកឡើងថាខេត្តកំពង់ស្ពឺជាខេត្តទី២ដែលរោងចក្រស៊ីម៉ង់ត៍CONCHបានបង្កើតឡើងបន្ទាប់ពីខេត្តបាត់ដំបង។រោងចក្រនេះនិងផ្តល់ឱកាសការងារជូនបងប្អូនប្រជាពលរដ្ឋប្រមាណជាង២ពាន់នាក់ និងមានសមត្ថភាពផលិតស៊ីម៉ង់ត៍បាន៥ពាន់តោនក្នុងថ្ងៃនិង២លានតោនក្នុងមួយឆ្នាំ។

អ្នកឧកញ៉ា វិន ហួរ បានបន្ថែមថា ស្របពេលដែលប្រទេសកម្ពុជាកំពុងមានការអភិវឌ្ឍន៍រីកចម្រើន តម្រូវការនៃការប្រើប្រាស់ស៊ីម៉ង់ត៍សម្រាប់សាងសង់គិតជាមធ្យម១០លានតោន។ហើយបច្ចុប្បន្នរោងចក្រនៅខេត្តបាត់ដំបងអាចផលិតបាន៧លានតោនក្នុងមួយឆ្នាំនិងខេត្តកំពង់ស្ពឺផលិតបាន២លានតោនក្នុងមួយឆ្នាំ ចឹងនៅខ្វះតែ១លានតោនប៉ុណ្ណោះដែលត្រូវនាំចូលពីប្រទេសជិតខាង។

លោក វ៉ី សំណាង អភិបាលខេត្តកំពង់ស្ពឺបានលើកឡើងថាខេត្តកំពង់ស្ពឺនិងក្លាយជាខេត្តផ្គត់ផ្គង់ស៊ីម៉ង់ត៍ទី២បន្ទាប់ពីខេត្តបាត់ដំបង ហើយប្រជាពលរដ្ឋដែលរស់នៅក្នុងខេត្តនេះនិងអាចមានលទ្ធភាពរស់នៅផ្ទះថ្មគ្រប់គ្នា មានផ្លូវបេតុងខ្វាត់ខ្វែង គ្រាដែលខេត្តអាចផលិតស៊ីម៉ង់ត៍បានដោយខ្លួនឯង ដោយមិនមានការនាំចូល។ប្រការនេះការផលិតបានដោយខ្លួនឯង គឺស៊ីម៉ង់ត៍មានតម្លៃថោកប្រជាពលរដ្ឋមានលទ្ធភាពក្នុងការសង់ផ្ទះថ្មសម្រាប់រស់នៅ មួយវិញទៀតក៏ផ្តល់ឱកាសការងារដល់ប្រជាពលរដ្ឋយើងផងដែរ។

អភិបាលខេត្តកំពង់ស្ពឺក៏បានបញ្ជាក់ផងដែរថា ខេត្តកំពង់ស្ពឺបច្ចុប្បន្នមានរោងចក្រ សហគ្រាសប្រមាណ៣៨៥កន្លែងនិងមានកម្មករនិយោជិកធ្វើការ១៥៧០២៧នាក់ ស្រី១១៥៨៩៧នាក់ ដែលមានប្រាក់ឈ្នួលមធ្យម៤៨១លានដុល្លាក្នុងមួយឆ្នាំ។ហើយក្នុងនោះរោងចក្រ សហគ្រាសវិស័យកាត់ដេរចំនួន១៩១មានកម្មករនិយោជិតសរុបជាង១៤ម៉ឺន៥ពាន់នាក់ដែលមានប្រាក់ឈ្នួលមធ្យមសរុប៤៥១លានដុល្លាក្នុងមួយឆ្នាំ ៕