បើតាមលោក វ៉ី សំណាង ជាលទ្ធផល គណៈប្រតិភូបានអញ្ជើញជួបពិភាក្សាការងារ និងទស្សនៈកិច្ចផ្ទាល់ដូចមានខាងក្រោម ៖ ១- សួនឧស្សាហ៍កម្ម SITOY GROUP ស្ថិតនៅសង្កាត់ ហូវ ជៀក ក្រុង ដុងហ្គ័ន (មាន ៤រោចក្រ សហគ្រាស) ដែលកំពុងផលិតកាបូបម៉ាកយីហោល្បីៗនាំចេញទៅក្រៅប្រទេស ហើយ ម៉ាកយីហោទាំងអស់នេះ នឹងទៅបង្កើតរោងចក្រនៅខេត្តកំពង់ស្ពឺ។ ២- សួនឧស្សាហ៍កម្ម ហុង អ៉ី  ចំនួន ៥ទីតាំង (មាន ៥០ រោងចក្រ សហគ្រាស)  ដែលមាន រោងចក្រ សហគ្រាស ចំនួន ២៣ (រោងចក្រ ផលិតសម្លៀកបំពាក់ និងតម្បាញ, ផលិតស្បែកជើង, គ្រឿងបង្គុំអេឡិកត្រូនិក, ស្រោម និងស្គ្រីនទូរស័ព្ទ, ជ្រលក់ពណ៌,) នឹងត្រូវទៅបង្កើត នៅខេត្តកំពង់ស្ពឺ ដែលមានតម្រូវការកម្លាំងពលកម្មជំហ៊ានដំបូងប្រមាណ ២០,០០០នាក់។

លោក TERAS YEUNG អគ្គនាយកក្រុមហ៊ុន SITOY GROUP បានបញ្ជាក់ ការប្តេជ្ញាចិត្ត និងភាពជឿជាក់លើកម្ពុជា ក្រុមហ៊ុនរបស់លោកនឹងទៅបង្កើតសាខានៅខេត្តកំពង់ស្ពឺ ចំនួន ២ រោងចក្រ (ផលិតកាបូបម៉ាកល្បីៗ) មានតម្រូវការកម្លាំងពលកម្មជំហ៊ានដំបូងចំនួនប្រមាណ ៣,០០០កន្លែង ហើយនឹងត្រូវទៅអោយបានឆាប់បំផុត នាចុងឆ្នាំនេះ។

សូមបញ្ជាក់ថា រោងចក្រ សហគ្រាស ដែលនឹងត្រូវទៅបង្កើតនៅខេត្តកំពង់ស្ពឺ មានចំនួន ២៥កន្លែង ហើយជាជំហាដំបូងនេះ មានតម្រូវការកម្លាំងពលកម្មប្រមាណ ២៣,០០០កន្លែង ដែលនឹងត្រូវមានវត្តមាននៅខេត្តកំពង់ស្ពឺ នាចុងឆ្នាំ២០២៣ នេះ៕