លោក ហ៊ុន ម៉ានី លើកឡើងថា ការសម្ពោធដាក់ឱ្យប្រើប្រាស់ជាផ្លូវការនូវផ្លូវក្រាលបេតុង៥ខ្សែនេះ ក្នុងគោលបំណងសំខាន់បំផុតនោះគឺធ្វើឱ្យមានលក្ខណៈល្អប្រសើរដល់ការធ្វើដំណើរបស់ប្រជាពលរដ្ឋនៅក្នុងមូលដ្ឋាន ចំណេញពេលវេលា កាត់បន្ថយការចំណាយក្នុងការដឹកជញ្ជូនផលិតផល ក៏ដូចជាកសិផលទៅកាន់ទីផ្សារ និងមានភាពងាយស្រួល ក្នុងការទទួលបាននូវសេវាសាធារណៈផ្សេងៗ។ លើសពីនេះហេដ្ឋារចនាសម្ព័ន្ធ និងគមនាគមន៍ដឹកជញ្ជូននៅក្នុងមូលដ្ឋាន ពិតជាមានសារៈសំខាន់ណាស់ក្នុងការជំរុញដំណើរអន្តរកម្មផ្នែកសេដ្ឋកិច្ច សង្គមកិច្ច រវាងតំបន់ជនបទ និងទីប្រជុំជន។ហើយវិស័យនេះ គឺជាសរសៃឈាមសេដ្ឋកិច្ចដ៏សំខាន់ ក្នុងការផ្សារភ្ជាប់សកម្មភាពធុរកិច្ចផ្សេងៗក្នុងតំបន់ ឱ្យមានភាពរស់រវើក និងកាន់តែសកម្មឡើងទៀត ដែលជាមូលដ្ឋានគ្រឹះ ក្នុងការជំរុញកំណើនប្រាក់ ចំណូលរបស់ប្រជាជននៅជនបទ។
លោក ហ៊ុន ម៉ានី គូសបញ្ជាក់ថាក្រោមដំបូលនៃសន្តិភាពនិងស្ថេរភាពនយោបាយពេញលេញ រាជរដ្ឋាភិបាល បានដាក់ចេញ និងអនុវត្តជាបន្តបន្ទាប់ នូវយុទ្ធសាស្ត្រចតុកោណ និងកម្មវិធីកំណែទម្រង់សំខាន់ៗនានា សំដៅលើកកម្ពស់ការអភិវឌ្ឍសេដ្ឋកិច្ចសង្គម សុខុមាលភាពប្រជាពលរដ្ឋ និងសង្គមជាតិទាំងមូល។ ការរក្សាបាននូវសន្តិភាពពេញលេញ ទាំងខាងនយោបាយនិងសន្តិសុខដ៏រឹងមាំនេះ បានធ្វើឱ្យការអភិវឌ្ឍសង្គម សេដ្ឋកិច្ច សង្គមកិច្ច ការសាមគ្គី ឯកភាពជាតិ ការពង្រឹងលទ្ធិប្រជាធិបតេយ្យ ពិសេសការលើកកម្ពស់ជីវភាពរស់នៅរបស់ប្រជាពលរដ្ឋគឺមានការរីកចម្រើនយ៉ាងឆាប់រហ័ស។ហើយទន្ទឹមនិងភាពរីកចម្រើនក្រោមម្លប់នៃសុខសន្តិភាពនេះទើបធ្វើប្រទេសកម្ពុជាមានឱកាសក្លាយជាម្ចាស់ផ្ទះរៀបចំព្រឹត្តិការណ៍ដ៏ធំបានដោយជោគជ័យគឺព្រឹត្តិការណ៍sea game និងpara game ដែលធ្វើឱ្យពិភពលោកស្គាល់កម្ពុជាកាន់តែច្បាស់ថាជាប្រទេសតូចតែមានបេះដូងធំ។
ក្នុងឱកាសនោះដែរ លោក ហ៊ុន ម៉ានី បានថ្លែងអំណរអគុណយ៉ាងជ្រាលជ្រៅបំផុត ដល់រាជរដ្ឋាភិបាល ដែលបានស្ថាបនាសមិទ្ធផលថ្មីៗជាច្រើនសំដៅលើកកម្ពស់ជីវភាពប្រជាពលរដ្ឋ កាត់បន្ថយភាពក្រីក្រ។
លោកបានអំពាវនាវដល់ប្រជាពលរដ្ឋ អាជ្ញាធរគ្រប់លំដាប់ថ្នាក់ឱ្យចូលរួមជួយគាំទ្រនិងយកចិត្តទុកដាក់ក្នុងការប្រើប្រាស់ និងជួយថែរក្សាការពារសមិទ្ធផល ដែលបានកសាងឡើងនាពេលនេះជាគុណប្រយោជន៍ដល់សាធារណៈ ពីព្រោះផ្លូវគឺជាសសៃឈាម សម្រាប់ធ្វើចរាចរណ៍ទៅមក ដូចដែលពាក្យចាស់លោកពោលថា “មានផ្លូវគឺមានសង្ឃឹម” ។
សូមបញ្ជាក់ផងដែរថាផ្លូវទាំង៥ខ្សែដែលបានដាក់សម្ពោធគឺបានបម្រើដល់ការធ្វើចរាចរណ៍និងផ្សារភ្ជាប់ភូមិចំនួន១២គឺភូមិរំដួល ភូមិស្រែអំបិល ភូមិបាក់ចិញ្ចៀន ភូមិត្រគៀត ភូមិថ្មបាំង ភូមិបាញ់កង្កែប ភូមិព្រៃផ្ដៅ ភូមិត្រពាំងខ្យង ភូមិព្រៃសូភា ភូមិលំពែងព្រះរាម ភូមិថ្កូវ និងភូមិសុបិន្ត នៃឃុំត្រពាំងគង ស្រុកសំរោងទង ខេត្តកំពង់ស្ពឺ៕