ក្នុងពិធីសម្ពោធដាក់ឱ្យប្រើប្រាស់ជាផ្លូវការនូវអគារថ្មីនៃបណ្ឌិត្យសភាភូមិន្ទយុត្តិធម៌កម្ពុជា និង ពិធីប្រគល់សញ្ញាបត្រជូនដល់សិស្សចៅក្រម សិស្សក្រឡាបញ្ជី សិស្សអាជ្ញាសាលា ព្រមទាំងសិស្សសារការី ដែលបានបញ្ចប់ការសិក្សានៅបណ្ឌិត្យសភាភូមិន្ទយុត្តិធម៌កម្ពុជាប្រមាណជិត២ពាន់នាក់ នៅខណ្ឌជ្រោយចង្វា រាជធានីភ្នំពេញ នាព្រឹកថ្ងៃអង្គារ ទី៦ មិថុនា សម្ដេចតេជោ ហ៊ុន សែន នាយករដ្ឋមន្រ្តីបញ្ជាក់ថា រាជរដ្ឋាភិបាលមានកាតព្វកិច្ចចាំបាច់ដើម្បីការពារនូវសណ្ដាប់ធ្នាប់ ការពារនូវធនធានធម្មជាតិ និងព្រៃឈើរបស់យើង ។

សម្ដេចនាយករដ្ឋមន្រ្តីថា «មានពេលខ្លះអ្នកមានអំណាចរបស់យើងមួយចំនួនក៍ទៅធ្វើរឿងហ្នឹងដែរ អ្នកមានលុយរបស់យើងមួយចំនួនក៍ជួលមនុស្សទៅកាប់ដែររួចហើយឱ្យលុយទៅថ្ងៃក្រោយយកឈ្មោះប្រជាជនទៅពាំង ដល់ទៅពេលរដ្ឋធ្វើសម្បទានឱ្យ អាដីហ្នឹងវាមានបានទៅប្រជាជនណា វាបានទៅអ្នកមានលុយ»។

បើតាមនាយករដ្ឋមន្រ្តី «ហើយមន្រ្តីរបស់យើងនេះ បើមានការពាក់ព័ន្ធក្នុងរឿងនេះ សូមកុំបន្តោស ហ៊ុន សែន។យើងមិនអាចទុកឱ្យនៅក្នុងក្របខ័ណ្ឌរដ្ឋ ឬក្របខ័ណ្ឌយោធា ឬក្របខ័ណ្ឌនគរបាល និយាយរួមក្របខ័ណ្ឌដែលស៊ីប្រាក់ខែរដ្ឋបានទេ រាប់ទាំងមន្រ្តីតុលាការ ខ្ញុំអត់ចាប់តុលាការទេ ខ្ញុំចាប់មន្រ្តីខូច»។ បន្ថែមពីនោះ សម្ដេចបានបញ្ជាឱ្យ សៅ សុខា លោក សាយ សំអាល់ និងអាជា្ញធរតាមខេត្តចាត់ការរឿងនេះ ៕