នៅក្នុងបទសម្ភាសន៍ជាមួយកាសែតអាមេរិក Wall Street Journal ដែលចេញផ្សាយ កាលពីថ្ងៃសៅរ៍ លោក ហ្សេលេនស្គី បានសង្កត់ធ្ងន់ដូច្នេះថា «យើងជឿជាក់យ៉ាងមុតមាំថាយើងនឹងទទួលបានជ័យជម្នះ...ខ្ញុំមិនដឹងនោះទេថាតើវានឹងត្រូវចំណាយពេលយូរប៉ុណ្ណា ។ និយាយដោយស្មោះត្រង់ វាអាចនឹងត្រូវធ្វើឡើងក្រោម មធ្យោបាយផ្សេងៗគ្នា។ ប៉ុន្តែយើងនឹងធ្វើវា ហើយយើងបានត្រៀមលក្ខណ:រួចជាស្រេច»។

លោក ហ្សេលេនស្គី កាលពីខែឧសភា ធ្លាប់បានលើកឡើងថា អ៊ុយក្រែន ត្រូវការរង់ចាំអាវុធទំនើបៗរបស់លោកខាងលិចបញ្ជូនមកដល់សិន មុននឹងបើក ប្រតិបត្តិការវាយបក ខណៈលោកបានធ្វើយុទ្ធនាការការទូតនៅក្រៅប្រទេស ដើម្បីជំរុញឱ្យលោកខាងលិចបន្តផ្ដល់អាវុធ និងការគាំទ្រ សំដៅជួយអ៊ុយក្រែនសម្រេច បានជោគជ័យក្នុងប្រតិបត្តិការវាយបកនេះ។ គេមិនទាន់ដឹងថាតើប្រតិបត្តិការវាយបករបស់អ៊ុយក្រែន នឹងធ្វើឡើងនៅតំបន់ណាមួយទេ តែរុស្ស៉ីកំពុងគ្រប់គ្រង់ទឹកដី អ៊ុយក្រែនមួយភាគធំនៅភាគខាងកើត ភាគខាងត្បូង និងភាគអាគ្នេយ៍៕