ក្នុងពិធីបើកការដ្ឋាន នៅលើមហាវិថីអ្នកឧកញ៉ា មហាភក្ដីសប្បុរិសភោគាធិបតី ហ៊ុន នាង ក្នុងភូមិទួលរការ សង្កាត់ចាក់អង្រែក្រោម ខណ្ឌមានជ័យ នាព្រឹកថ្ងៃទី២៥ ខែមីនា ឆ្នាំ២០២៣ ដែលមានការចូលរួមពីអ្នកឧកញ៉ា លាង ឃុន ប្រធានក្រុមប្រឹក្សាភិបាល ក្រុមហ៊ុន ជីប ម៉ុង លោក ឃួង ស្រេង បានបន្តថា ការបើកការដ្ឋានស្ថាបនាស្ពានបេតុង ២ កន្លែង នៅលើមហាវិថីអ្នកឧកញ៉ាមហាភក្តីសប្បរិសភោគាធិបតី ហ៊ុន នាង គឺជាផ្នែកមួយ នៃការអនុវត្តគម្រោងអភិវឌ្ឍន៍ ទីក្រុងរណបបឹងទំពន់- ជើងឯក ដែលជាការចូលរួម ចំណែករបស់វិស័យឯកជន ស្របតាមគោលការណ៍របស់រាជរដ្ឋាភិបាល ។
ជាមួយគ្នានោះ លោកអភិបាលរាជធានីភ្នំពេញ ក៏បានផ្តាំផ្ញើដល់អាជ្ញាធរមូលដ្ឋាន មន្ទីរ-អង្គភាព ជំនាញពាក់ព័ន្ធ ក្រុមហ៊ុនសាងសង់ និងគ្រប់ភាគីពាក់ព័ន្ធ ត្រូវផ្តល់កិច្ចសហការរួម គ្នាដោះស្រាយផលប៉ះពាល់ និងខិតខំអនុវត្តគម្រោង ឱ្យបានត្រឹមត្រូវ តាមលក្ខខណ្ឌ បច្ចេកទេស ដើម្បីធានាការប្រើប្រាស់បានយូរអង្វែង ប្រកបដោយគុណភាព និងសោភ័ណភាពល្អស្អាត។
បន្ថែមពីនោះ លោកថា ក្រោយឆ្នាំ១៩៧៩ តំបន់បឹងទំពន់ -ជើងឯក គឺជាតំបន់វាលទំនាប និងលិចទឹក នៅរដូវវស្សា ស្ថិតនៅភាគខាងត្បូង រាជធានីភ្នំពេញ ត្រូវបានប្រើប្រាស់ ជាអាងស្តុកទឹកសំអុយ និងជាស្រែប្រាំង ដាំបន្លែបង្ការបន្តិចបន្តួច សម្រាប់អាស្រ័យផលរបស់ប្រជាពលរដ្ឋ រស់នៅជុំវិញ តំបន់នេះតែប៉ុណ្ណោះ។ នៅឆ្នាំ២០០៦ រាជរដ្ឋាភិបាល បានសម្រេចកែលម្អតំបន់នេះ ជាទីក្រុងរណបថ្មី សំដៅបង្កើននូវសក្តានុពលសេដ្ឋកិច្ច សង្គមកិច្ច ឱ្យបានខ្លាំងក្លា ថែមទៀត ឆ្លើយតបទៅនឹងតម្រូវការ អភិវឌ្ឍន៍យ៉ាងឆាប់រហ័ស របស់រាជធានី ភ្នំពេញ។
ផ្អែកតាមប្លង់មេនៃគម្រោង តំបន់នេះ ត្រូវស្ថាបនាមហាវិថីចំនួន ៣ខ្សែ រូមមាន (ខ្សែទី១) មហាវិថីសម្តេច តេជោ ហ៊ុន សែន (ខ្សែទី២) មហាវិថីអ្នកឧកញ៉ាមហា ភក្ដីសប្បុរិសភោគា ធិបតី ហ៊ុន នាង និង (ខ្សែទី៣) មហាវិថីកាត់ទទឹងទី២ ព្រមទាំងត្រូវ ស្ថាបនាផ្លូវមេចំនួន ៦១ ខ្សែ និងបំពាក់ភ្ជាប់នូវបណ្តាញទឹកស្អាត បណ្តាញអគ្គិសនី ខ្សែកាបអុបទិក ប្រព័ន្ធលូបង្ហូរទឹកភ្លៀង ទឹកសំអុយ រក្សាទុកអាង ស្តុកទឹក អាងប្រព្រឹត្តកម្មទឹកកខ្វក់ លើកកម្ពស់ដីរូបសាស្ត្រកំណត់តំបន់បៃតង រៀបចំប្រព័ន្ធចរាចរណ៍ដឹកជញ្ជូន និងសំណង់ សិល្បការជាច្រើនទៀត។
ក្រោយពេលស្ពានទាំងពីរនេះ ត្រូវបានស្ថាបនារួចរាល់ នឹងទទួលបានអត្ថប្រយោជន៍ ជាច្រើន នោះគឺការតភ្ជាប់តួមហាវិថីអ្នកឧកញ៉ា មហារក្តីសប្បរិសភោគាធិបតី ហ៊ុន នាង ទាំងមូល ដែលជាផ្លូវយុទ្ធសាស្ត តភ្ជាប់ពីមហាវិថីសម្តេចតេជោ ហ៊ុន សែន ឆ្ពោះទៅកាន់ផ្លូវលេខ ៣៧១ សម្រាប់សម្រួលដល់ការធ្វើដំណើរ ចំពោះប្រជាពលរដ្ឋ ក្នុងតំបន់នេះ និងជាយុទ្ធសាស្ត្រ នៃការអភិវឌ្ឍទីក្រុង ដើម្បីជួយសម្រាលការកក ស្ទះចរាចរណ៍ លើមហាវិថីសម្ដេចតេជោ ហ៊ុន សែន, វិថីកងយោធពលខេមរភូមិន្ទ និងកំណាត់ផ្លូវលេខ ៣៧១ ដែលនឹងធ្វើឱ្យទីក្រុងរបស់យើង កាន់តែមានលក្ខណៈ សម្បត្តិប្រកួតប្រជែងខ្ពស់ ជាពិសេសកាត់បន្ថយ ថ្លៃដើម នៃការចំណាយលើការដឹក ជញ្ជូនផលិតផល និងសេវាកម្មនានា កាន់តែប្រសើរឡើង។ នេះបើតាមការបញ្ជាក់ពីលោក ឃួង ស្រេង ។
អ្នកឧកញ៉ា លាង ឃុន ប្រធានក្រុមប្រឹក្សាភិបាលក្រុមហ៊ុន ជីប ម៉ុង បានលើកឡើងថា ស្ថានបេតុង ស្ថិតនៅលើមហាវិថីអ្នកឧកញ៉ាមហាភក្ដី សប្បុរិសភោគាធិបតី ហ៊ុន នាងនេះ មាន២ កន្លែង ក្នុងនោះស្ពានទី១ មានប្រវែង ២០ ម៉ែត្រ គុណនឹង ២៨,៥ ម៉ែត្រ និងស្ពានទី២ មានប្រវែង ១៦០ ម៉ែត្រ គុណនឹង ២៨,៥ម៉ែត្រ ដោយប្រើប្រាស់ពេលវេលា នៃការស្ថាបនាចំនួន ២៤ ខែ និងចំណាយ ថវិកាចំនួន ៥ លានដុល្លារសហរដ្ឋអាមេរិក ដើម្បីបំរើផលប្រយោជន៍សាធារណៈ និងដើម្បីជាការលើកកម្ពស់សោភ័ណភាព រាជធានីភ្នំពេញ កាន់តែមានភាពស្រស់ បំព្រងផងដែរ៕