ក្នុងចំណោមប្រជាពលរដ្ឋរាប់សិបលាននាក់ អ្នកមានលុយ ឬហៅថា ឧកញ៉ា ម្នាក់ៗបានប្រកាសជួយ លោក ព្រំ សំណាង ជាបន្តបន្ទាប់ ក្នុងនោះមានឧកញ៉ា ស្រី ចាន់ថន អ្នកស្រី ទ្រី ដាណា រួមនិងអ្នកមានលុយមួយចំនួនទៀត ។

ក្រៅពីអ្នកជំនួញ អ្នកនយោបាយឯណោះវិញក៍បានបង្ហោះសារគាំទ្រ លោក ព្រំ សំណាង ផងដែរ ក្នុងនោះមានទាំង លោក ហ៊ុន ម៉ាណែត បេក្ខភាពអ្នកបន្តវេននាយករដ្ឋមន្រ្តី រួមនិង លោក ជុំ កុសល ជាដើម ។

យោងតាមការបង្ហោះសាររបស់លោក ជុំ កុសល បានឱ្យដឹងថា កីឡាករព្រំ សំណាង បានឈ្នះគូប្រកួតកំរិតពិភពលោកហើយ អាចនិយាយបានថាគាត់( ព្រំ សំណាង)គឺជាកីឡាករគុនខ្មែរមួយរូបដែលមានសក្តានុពល និងមានក្តីសង្ឃឹមខ្ពស់ក្នុងការដណ្តើមមេដាយមាសជូនជាតិក្នុងព្រឹត្តិការណ៍សុីហ្គេមខាងមុខនេះ ។ ដូច្នេះ ស្នើសុំដល់បងប្អូនទាំងឡាយដែលបានប្រកាសថានឹងផ្តល់ប្រាក់រង្វាន់ជាច្រើនចំពោះកីឡាកររូបណាប្រកួតឈ្នះ បូខាវ នោះ សូមបង្វែរមកជួយជ្រោមជ្រែងដល់កីឡាករព្រំ សំណាងវិញ ដើម្បីមានលទ្ធភាពគ្រប់គ្រាន់ក្នុុងហ្វឹកហាត់បន្ថែមឲ្យកាន់តែបានល្អថែមទៀត ។

សូមបញ្ជាក់ថា នេះជាកីឡាករទី២ហើយដែលដណ្ដើមបានខ្សែក្រវ៉ាត់ក្នុងប្រទេសថៃ ដោយកីឡាករ ទី១ ឈ្មោះ ធឿន ធារ៉ា ៕