អធិការនៃអធិការដ្ឋាននគរបាលស្រុកភ្នំស្រួចលោកវរសេនីយ៍ឯក សាយ ប៊ុនថន បានឱ្យដឹងថា ដោយទទួលបានព័ត៌មានពីបណ្ដាញសង្គមមកថាមានករណីក្មេងទំនេីងតែងធ្វើសកម្មភាពប្លន់ប្រេងពីរថយន្ដដែលពួកគាត់បានឈប់សំរាកពេលយប់នៅតាមបណ្ដោយផ្លូវជាតិលេខ៤ ក្នុងស្រុកភ្នំស្រួច ជារៀងរាល់យប់ លោកឧត្ដមសេនីយ៍ទោ សម សាមួន ស្នងការ នគរបាលខេត្ដកំពង់ស្ពឺ បានដាក់បញ្ជាឱ្យផ្នែកយុត្តិធម៌ស្រុកភ្នំស្រួចបេីកការស្រាវជ្រាវបន្ទាន់ ដើម្បីរកឱ្យឃើញមុខសញ្ញាក្រុមចោរទាំងនោះ។
ក្រោយទទួលបានបទបញ្ជា កម្លាំងជំនាញស្រុកបានបើកប្រតិបត្តិការដោយសហការជាមួយមូលដ្ឋានប៉ុស្ដិ៍ ស្រាវជ្រាវប្រមូលព័ត៌មាននិងឈានទៅកំណត់បានមុខសញ្ញាក្មេងទំនេីងដែលជាក្រុមធ្លាប់ប្រព្រឹត្ដបទល្មេីសក្នុងមូលដ្ឋានកន្លងមក។
ជាលទ្ធផលក្នុងប្រតិបត្តិការនោះ សមត្ថកិច្ចជំនាញបានធ្វើការឃាត់ខ្លួនមុខសញ្ញាសង្ស័យចំនួន៤នាក់ ក្នុងនោះ១-ឈ្មោះ ភា រាជ ភេទប្រុស អាយុ២៩ឆ្នាំ ២.ឈ្មោះ មៀម សុធារៈ ភេទប្រុស អាយុ២៧ឆ្នាំ ៣.ឈ្មោះ បេង សំណាង ហៅវិត ភេទប្រុស អាយុ៣១ឆ្នាំ ៤.ឈ្មោះ ជីង រ៉ា ភេទស្រី អាយុ២១ឆ្នាំ ស្នាក់នៅបន្ទប់ជួលស្ថិតនៅក្នុងភូមិទី៤ ឃុំត្រែងត្រយឹង ស្រុកភ្នំស្រួច រីឯឈ្មោះ តូរ៉ា ភេទប្រុស និងបក្ខពួកមួយចំនួនបានគេចខ្លួនបាត់ស្រមោល។
នៅចំពោះមុខសមត្ថកិច្ចជនសង្ស័យ បានសារភាពថាខ្លួនពិតជាបានធ្វេីសកម្មភាពគំរាមយកដុំថ្មគប់កញ្ចក់រថយន្តយកដាវដេញគំរាមកាប់លេីអ្នកបេីកបររួចបូមយកប្រេងចេញពីរថយន្ដរបស់ដំណើរនោះប្រាកដមែន។
ដោយកន្លងទៅ ក្រុមខ្លួនតែងតែប្រព្រឹត្ដសកម្មភាពលួចបូមប្រេងពីរថយន្តញឹកញ៉ាប់និងគប់កញ្ចក់រថយន្ដគេពេលយប់ផងដែរ។បច្ចុប្បន្នជនសង្ស័យទាំង៤នាក់កំពុងក្រោមការសួរនាំរបស់អយ្យការសាលាដំបូងខេត្តកំពង់ស្ពឺ ៕