កម្ពុជាសូមស្វាគមន៍ភ្ញៀវទេសចរជាតិ និងអន្តរជាតិ មកលេងកម្សាន្តនៅតាមតំបន់និងខេត្តមួយចំនួន ខណៈដើមខែមករា ឆ្នាំ២០២៣នេះ មានភ្ញៀវមកលេងជិត៤៦ម៉ឺននាក់ ។ នេះបើតាមរបាយការណ៍ពីក្រសួងទេសចរណ៍បានបង្ហាញកាលពីថ្ងៃអង្គារ ទី១០មករា ។
របាយការណ៍បានបញ្ជាក់ថា ចាប់ពីថ្ងៃទី២-៨ ខែមករា ២០២៣ នៅទូទាំងប្រទេស កម្ពុជាទទួលបានភ្ញៀវសរុបមានចំនួន៤៥៩,៤០៩នាក់ ក្នុងនោះភ្ញៀវជាតិ៤១៥,៧៩៣នាក់ និងភ្ញៀវបរទេស៤៣,៦១៦នាក់។
ក្នុងចំណោមកន្លែងកម្សាន្តទាំងនោះ គោលដៅទេសចរណ៍សំខាន់ៗដែលលេចជាងគេមានខេត្តព្រះសីហនុ មានភ្ញៀវទៅលេង ២២៥,៦៥៩នាក់ * ខេត្តសៀមរាប ៤៧,០៧០នាក់ * រាជធានីភ្នំពេញ ៤១,៦៤៦នាក់ * ខេត្តកំពត ៣០,៤០៨នាក់ * ខេត្តកំពង់ចាម ១៦,២១៣នាក់ * ខេត្តបាត់ដំបង ១៦,១៥៣នាក់។
ចំនួនភ្ញៀវទេសចរប្រមាណជាង៤៥ម៉ឺននាក់ សម្រាប់សប្តាហ៍ដំបូងនៃឆ្នាំ២០២៣នេះ អាចចាត់ទុកថាជាការចាប់ផ្តើមដ៏ល្អនៃចរន្តភ្ញៀវទេសចរផ្ទៃក្នុងសម្រាប់ឆ្នាំថ្មីនេះ ខណៈដែលអំឡុងពេលឆ្លងឆ្នាំសាកលកន្លងមកមានភ្ញៀវប្រមាណ២.០២លាននាក់ បានដើរកម្សាន្តទូទាំងប្រទេស៕