យោងតាម Insider ការប៉ាន់ប្រមាណថាទ្រព្យសម្បត្តិសុទ្ធរបស់ Elon Musk បានធ្លាក់ចុះចំនួន១២៤ ពាន់លានដុល្លារនៅឆ្នាំនេះ ដោយឈានដល់កម្រិតទាបបំផុតចាប់តាំងពីឆ្នាំ 2020។
ដោយផ្អែកលើទិន្នន័យពី Bloomberg Billionaires Index ទ្រព្យសម្បត្តិសុទ្ធរបស់ម្ចាស់ក្រុមហ៊ុន Tesla បច្ចុប្បន្នមាន១៤៨ ពាន់លានដុល្លារ។ លោក Elon Musk គឺជាមហាសេដ្ឋីលំដាប់លេខ ២ នៅលើពិភពលោក តំណែងលេខ ១ ជារបស់លោក Bernard Arnault នាយកប្រតិបត្តិ LVMH ។
ទ្រព្យសម្បត្តិរបស់ Musk បានធ្លាក់ចុះជិត ៨ ពាន់លានដុល្លារកាលពីថ្ងៃទី 20 ខែធ្នូ បន្ទាប់ពីភាគហ៊ុនរបស់ក្រុមហ៊ុន Tesla បានធ្លាក់ចុះ។ តម្លៃភាគហ៊ុនរបស់ក្រុមហ៊ុនផលិតរថយន្តបានធ្លាក់ចុះប្រហែល 61% ចាប់តាំងពីខែមករា ហើយធ្លាក់ចុះ 12% កាលពីសប្តាហ៍មុន។
លោក Elon Musk ជឿជាក់ថាការកើនឡើងអត្រាការប្រាក់បាននាំឱ្យវិនិយោគិនលក់ភាគហ៊ុន និងយកចិត្តទុកដាក់លើសាច់ប្រាក់។ ទោះជាយ៉ាងណាក៏ដោយ អ្នកវិភាគ និងម្ចាស់ភាគហ៊ុនមួយចំនួនបានលើកឡើងថា វាគឺជាការទិញយក Twitter ដែលបណ្តាលឱ្យ Musk លែងផ្តោតលើ Tesla ទៀតហើយ។ នេះធ្វើឱ្យវិនិយោគិនជាច្រើនព្រួយបារម្ភអំពីស្ថានភាពអភិវឌ្ឍន៍របស់ក្រុមហ៊ុន Tesla នាពេលអនាគត៕