បើតាមសេចក្ដីរាយការណ៍ រយៈពេលជិតមួយខែកន្លងមកនេះ នៅក្នុងក្រុង ស្រុក និងខេត្តស្ទឹងត្រែង តែងតែកើតមាន សកម្មភាព លួច ឆក់ ប្លន់ និងបង្កហិង្សា ជាច្រើនលើកច្រើនសារ រួមទាំងការប្រើប្រាស់អាវុធដោយគ្មានការអនុញ្ញាត រហូតបង្កឱ្យប្រជាពលរដ្ឋមានការភិតភ័យ ។
ដើម្បីបង្កលក្ខណ មានស្ថេរភាពនិងសន្តិសុខជូនប្រជាជនកាលពីចុងខែវិច្ឆិការកន្លងទៅថ្មីៗនេះ កម្លាំងអាវុធហត្ថខេត្តស្ទឹងត្រែង ក្រោមបទបញ្ជារបស់មេបញ្ជាការកងរាជអាវុធហត្ថខេត្ត លោក ឧត្តមសេនីយ៍ត្រី អៀង វ៉ាន់ឌី បានដឹកនាំកម្លាំងអាវុធហត្ថចុះប្រតិបត្តិការល្បាតតាមដងផ្លូវទាំងយប់ដើម្បីត្រួតពិនិត្យទៅលើក្រុមបំពុលសង្គម ក្រុមក្មេងទំនើង ក្រុមចោរលួច ក្រុមចោរប្លន់ ក្រុមចោរឆក់ជាដេីម។
ជាក់ស្តែងក្នុងប្រតិបត្តិការខាងលេី កម្លាំងកងរាជអាវុធហត្ថបានឃាត់ខ្លួនមនុស្សបានចំនួន២១នាក់ និងម៉ូតូបំពាក់បំពង់ស៊ីមាំងឮខ្លាំងចំនួន១០គ្រឿង។
ក្រោយធ្វើការសួរចម្លើយ ក្នុងចំណោមមនុស្សទាំង២១នាក់ ខាងលើ ក៍មានមនុស្ស៣នាក់ ជាប់ពាក់ពន្ធករណីប្រើអំពើហិង្សា ដោយចេតនា និងប្រើប្រាស់អាវុធ គ្មានការអនុញ្ញាត។ ដោយឡែក១៨នាក់ទៀត ត្រូវបានអប់រំណែនាំរួចប្រគល់អោយអាណាព្យាបាលមកនាំត្រឡប់ទៅផ្ទះវិញ។
ពាក់ព័ន្ធម៉ូតូដែលឃាត់ជាមួយមនុស្សទាំង២១នាក់ខាងលើ សរុប មានមានចំនួន១០គ្រឿង ក្នុងនោះមាន៩គ្រឿងពុំមានលិខិតស្នាមត្រឹមត្រូវ ត្រូវរក្សាទុកជាបណ្តោះអាសន្នរងចាំការបំពេញឯកសារគ្រប់គ្រាន់និងប្រគល់ជនម្ចាស់វិញ។ ចំណែកម៉ូតូ១គ្រឿង ត្រូវបានប្រគល់ជូនម្ចាស់វិញដោយសារមានលិខិតស្នាមត្រឹមត្រូវ។
គួរំលឹកផងដែរថា រហូតមកដល់ថ្ងៃនេះ កម្លាំងអាវុធហត្ថខេត្ត ស្ទឹងត្រែង នៅតែបន្តចុះល្បាតដដែល ដោយមិនកំណត់ពេលវេលាដេីម្បីសុខ សុវត្ថិភាពជូនប្រជាពលរដ្ឋ ៕