កំលុងជំនួបខាងលើដែលធ្វើឡើង នៅវិមាន Great Hall of the People ក្នុងរដ្ឋធានីប៉េកាំងនៃប្រទេសចិន លោក ស៉ី ក៏បានប្រាប់ លោក មីឈែល ផងដែរថា រូបលោកសង្ឃឹមថា ស្ថាប័នទាំងឡាយក៏ដូចជារដ្ឋជាសមាជិករបស់ EU នឹងប្រកាន់យកនូវទស្សនៈត្រឹមត្រូវ និងប្រកបដោយសត្យានុម័តចំពោះចិន។

លោកប្រធានាធិបតីចិនបានបន្តថា «ចិននឹងនៅតែបន្តបើកចំពោះក្រុមហ៊ុនអឺរ៉ុបជានិច្ច ហើយសង្ឃឹមថា EU នឹងអាចលុបចោលនូវការចូលលូកលាន់នានា ដើម្បីផ្តល់នូវបរិយាកាសអាជីវកម្មមួយ ដែលមានសមភាពនិងតម្លៃភាព សម្រាប់ក្រុមហ៊ុនចិន»។

ក្រៅពីលោក ស៉ី ជិនពីង លោក មីឈែល ដែលកំពុងស្ថិតក្នុងដំណើរបំពេញទស្សនកិច្ចរយៈពេល១ថ្ងៃ ក៏ជួបជាមួយនាយករដ្ឋមន្រ្តីចិន លោក លី ខឺឈាំង (Li Keqiang) ហើយនិងលោក លី ចានស៊ូ (Li Zhanzhu) ប្រធានគណៈកម្មាធិការអចិន្រ្តៃយ៍ នៃសភាប្រជាជនចិនថែមទៀតផង។

ការធ្វើទស្សនកិច្ចនេះទៀតសោតកើតមានឡើង បន្ទាប់ពីបណ្តាមេដឹកនាំអឺរ៉ុបបានបង្ហាញក្តីបារម្ភ ក្នុងកិច្ចប្រជុំមួយកាលពីខែតុលាកន្លងទៅ អំពីភាពពឹងផ្អែកសេដ្ឋកិច្ចរបស់អឺរ៉ុប លើប្រទេសចិន៕